Кеча, 29 апрель куни футбол бўйича Ўзбекистон Аёллар Олий лигаси мусобақасининг 3-тур ўйинлари бўлиб ўтди.

Тур доирасида 4 та ўйин ташкил этилди. Тошкентда ОКМК клубини қабул қилган “Бунёдкор” клуби 0:1 ҳисобида мағлубиятга учради. Ўйинда киритилган ягона голга Ситора Такабоева муаллифлик қилди.

Тошкентда ўтган яна бир баҳсда “Локомотив“ клуби “Қизилқум” жамоасини қабул қилди. Мазкур учрашувда ҳисоб очилмади.

Жиззахнинг “Сўғдиёна” клуби ушбу турга келиб дастлабки ғалабасини қўлга киритди. Жамоа сафарда “Бухоро” клуби меҳмони бўлди ва 2:1 ҳисобида ғалаба қозонди. Ғолиблардан голларга Моҳинур Нуриддинова ва Хумора Ўрозбоева муаллифлик қилди. Мезбонларнинг ягона жавоб голи эса Шарифа Ғаффорова ҳисобига ёзилди.

Турнинг сўнгги баҳсида Самарқанд “Динамо” клуби ўз майдонида Фарғонанинг “Нефтчи” клубини қабул қилди. Учрашув мезбонларнинг 3:0 ҳисобидаги ғалабаси билан якунланди. Ўйинда киритилган барча голлар Албена Бобоқулова ҳисобига ёзилди.