Машғулотларда вилоятда фаолият юритаётган журналист ва блогерлар, босма ва интернет журналистикаси, телевидение ва радио вакиллари, ахборот хизматлари ходимлари иштирок этмоқда.

Машғулотларда таниқли медиа экспертлар, контент маркази ходимлари ва журналистлар томонидан Ўзбекистон босма медиасидаги контент: амалиёт, муаммо ва ечим, Президент фаолиятини оммавий ахборот воситаларида ёритишнинг асосий йўналишлари, маҳаллий ва халқаро оммавий ахборот воситаларининг ижтимоий тармоқлардаги амалиётидан кейслар таҳлили каби мавзулар бўйича фикр алмашилмоқда.

— Медиа ҳафталик шунчаки ўқув семинар эмас, оммавий ахборот воситалари вакиллари, журналист ва блогерлар, контент тайёрлаш билан шуғулланувчилар учун ўзаро тажриба, фикр алмашиш майдони вазифасини ўтамоқда, — дейди медиа эксперт Элдор Асанов. — Бу майдонда кўпроқ амалий машғулотлар ва кейсларга алоҳида эътибор қаратяпмиз, бир-биримиздан ўрганяпмиз, тажрибаларимизни бўлишяпмиз. Бугунги кунда оммавий ахборот воситаларида, ижтимоий тармоқларда хабарлар, маълумотлар ва таҳлилий материалларни эълон қилишнинг ҳуқуқий, ахлоқий масалалари юзасидан ҳамкасбларимизга тушунча беришга ҳаракат қиляпмиз.

Ҳафталик давомида иштирокчилар медиа саводхонлик, ахборотни таҳлил қилиш, фейк хабарларни аниқлаш ҳамда аудиторияга мос ва сифатли контент яратиш бўйича билим ва кўникмаларини мустаҳкамлаш имконига эга бўладилар.

Мазкур тадбир ҳудудларда медиа маданиятни ривожлантириш, очиқ ва шаффоф ахборот муҳитини шакллантириш ҳамда ёшларни медиа соҳасига кенг жалб этишга хизмат қилади.

Абдулазиз ЙЎЛДОШЕВ, «Халқ сўзи».