Наманган вилояти ҳокими Шавкат Абдураззоқов вилоят марказидаги «Маърифат маскани» да оммавий ахборот воситалари вакиллари билан учрашди.

Мулоқотда жорий йилнинг 24 май куни бошланиб, қирқ кун давом этадиган 65-Халқаро «Гуллар фестивали» га тайёргарлик жараёнлари, фестиваль дастурига киритилган янгиликлар, фестиваль меҳмонлари, хусусан, хорижий давлатлардан келадиган сайёҳлар учун халқаро туризм андозаларига мувофиқ яратилаётган шарт-шароитлар тўғрисида батафсил маълумот берилди. Вилоят раҳбари ва оммавий ахборот воситалари вакиллари ўртасида фестиваль доирасидаги, маданий-маърифий тадбирлар, илмий-амалий анжуманлар, кўргазмалар ва бошқаларни мамлакатимиз ва халқаро медиамаконида кенг ёритиш юзасидан фикр-мулоҳаза алмашилди.

— Илгари бир ҳафта давом этадиган фестиваль ҳурматли Президентимизнинг тавсиялари билан қирқ кунлик муддатга узайтирилди, — дейди вилоят ҳокими Ш.Абдураззоқов. — Боиси, Наманганнинг ташриф қоғозига айланиб улгурган халқаро «Гуллар фестивали« кейинги йилларда меҳмонлар оқимини сиғдира олмай қолди, ҳатто ўтган йили фестивални яна бир ҳафтага узайтиришга тўғри келди. Бу йил фестивалнинг юбилей санаси муносабати билан меҳмонлар ташрифи янада кўпаяди. Шунинг учун фестиваль дастурига кўп янгиликлар киритилган. Яна бир муҳим янгилик фестивалда энг кўп гул эккан ташкилот ёки гулчини «Гиннес» рекордлар китобига киритиш бўйича талабнома берилган.

Мулоқотда журналистлар фестивални юқори савияда ёритиш, ахборот тарқатишда замонавий ёндашувларни жорий этиш, хорижий сайёҳлар оқимини оширишга хизмат қилувчи ПР-компанияларни кучайтириш, инфратузилмани яхшилаш, транспорт ва логистика, меҳмонлар учун қулай шарт-шароитлар яратиш каби масалалар юзасидан ўз фикр-мулоҳаза ва таклифларини билдирдилар.

Вилоят раҳбари барча таклифлар эътибор билан ўрганилишини, фестивал нафақат гўзаллик байрами, балки ҳудуднинг инвестициявий ва туристик салоҳиятини намоён этувчи муҳим майдон эканини таъкидлади.

Акрамжон Сатторов, «Халқ сўзи».