Андижон вилоятида ҳудудлар инфратузилмасини яхшилаш, аҳоли турмуш шароитини юксалтириш мақсадида мавжуд шаҳар ва туманлардан шароити нисбатан оғир бўлган иккитадан ҳудуд танлаб олиниб, уларда кенг кўламли ободонлаштириш ва бунёдкорлик ишлари амалга оширилмоқда. Бу жараёнда энг долзарб муаммоларни бартараф этиш, аҳоли учун муносиб ва қулай яшаш шароитларини яратиш устувор вазифа сифатида белгиланган.

— Авваллари маҳалламизда йўллар жуда оғир аҳволда эди, айниқса ёмғирли кунларда ҳаракатланиш анча мушкул бўларди, — дейди Марҳамат туманидаги «Йўламатол» МФЙда истиқомат қилувчи маҳалла аҳолиси вакили. — Ҳозир олиб борилаётган ишлар натижасида йўлларимиз босқичма-босқич тартибга келтирилмоқда. Бу эса, нафақат, транспорт ҳаракатига, балки кундалик ҳаётимизга ҳам катта енгиллик яратяпти.

Дарҳақиқат, Марҳамат тумани «Йўламатол» маҳалласи инфратузилма муаммолари сабаб «оғир маҳалла» тоифасига киритилган бўлиб, ҳудудда аниқ ва манзилли чора-тадбирлар изчил амалга оширилмоқда. Хусусан, ички йўл инфратузилмасини яхшилаш доирасида умумий узунлиги 4 километрни ташкил этувчи йўлларни асфальтлаш учун 1 миллиард 500 миллион сўм маблағ ажратилди ва қурилиш-таъмирлаш ишлари жадал суръатларда давом этмоқда. Бундан ташқари, электр энергияси, табиий газ, ичимлик суви таъминоти, аҳоли бандлиги, транспорт ва тиббиёт соҳасига оид муаммолар ҳам ижобий ечим топмоқда.

Саминжон ҲУСАНОВ, «Халқ сўзи».