«Uber» ўз иловаси орқали Дубайда ҳаво таксисига буюртма бериш имкониятини эълон қилди. Бу ҳақда компания веб-сайтида маълум қилинди.

Ҳаво таксисини йўлга қўйиш учун «Uber» Дубайда ушбу хизматни ишга туширишни режалаштираётган «Joby Aviation» компанияси билан ҳамкорлик қилди.

Таксилар тўрттагача йўловчини сиғдира олади ва тижорат учувчилари томонидан бошқарилади. Бунинг учун Дубайда тўртта қўниш майдончасини ташкил этиш режалаштирилган. Улар шаҳардаги халқаро аэропорт, савдо маркази, «Palm Jumeirah» оролидаги меҳмонхона ва Дубай Америка университетида жойлаштиради.

«Uber» ва «Joby Aviation» келажакда Нью-Йорк, Лос-Анжелес, Буюк Британия ва Японияда ҳаво такси хизматларини ишга туширишни режалаштирмоқда. Қайд этилишича, АҚШ шаҳарларида ушбу режани амалга ошириш учун компаниялар сертификат олишлари ва АҚШ Федерал авиация маъмуриятида синовдан ўтишлари керак.

Аввалроқ, Япониянинг «SkyDrive» компанияси томонидан ишлаб чиқилган учар автомобилнинг биринчи синов парвози Токиода бўлиб ўтганди.