Россияда 100 нафардан ортиқ ўзбекистонлик ишчи 4 ой давомида маошсиз ва озиқ-овқат таъминотисиз қолдирилгани аниқланди. Миграция агентлигининг маълум қилишича, умумий қарздорлик қарийб 24 миллион рубль (тахминан 324 минг доллар)ни ташкил этган.

Аниқланишича, айрим ишчилар ноқонуний ҳолатга тушиб қолган. Шундан сўнг улар Миграция агентлигига мурожаат қилган.

Агентликнинг Россиядаги ваколатхонаси томонидан адвокатлар жалб этилган, шунингдек, Бош консулхона томонидан ҳолат юзасидан тегишли органларга нота юборилиб, дипломатик каналлар ишга туширилган. Ҳуқуқни муҳофаза қилувчи органлар томонидан иш берувчиларга нисбатан Россия Жиноят кодексининг 145.1-моддаси билан жиноят иши қўзғатилган.

Олиб борилган ишлар натижасида 105 нафар ўзбекистонликка 9 миллион 403 минг рубль (тахминан 127 минг доллар) иш ҳақи ундириб берилган. Қарздорликнинг қолган қисми — 23 миллион 966 минг рубль (тахминан 323 минг доллар) 15 майга қадар тўланиши кутилмоқда.

Шунингдек, ишчиларнинг озиқ-овқат таъминоти қайта тикланган. Ноқонуний ҳолатга тушиб қолган фуқаролар Ўзбекистонга қайтарилиб, уларга моддий ёрдам ажратиш бошланган.

Билдирилишича, бу ишларда Ўзбекистоннинг Россиядаги дипломатик ваколатхоналари ҳамда Россия ҳуқуқни муҳофаза қилувчи органлари билан ҳамкорликда иш олиб борилган.