7 март куни олий таълим, фан ва инновациялар вазири Қўнғиротбой Шарипов Сирдарё вилояти Оқолтин туманида жойлашган 3-сон техникумда бўлиб, муассасада амалга оширилаётган қурилиш ва таъмирлаш ишлари, шунингдек таълим жараёни учун яратилган шарт-шароитлар билан танишди.

Ташриф давомида техникум раҳбарияти томонидан муассасанинг фаолияти, эришилган натижалар ҳамда мавжуд муаммолар юзасидан тақдимот ўтказилди. Унда техникумда 417 нафар ўқувчи таълим олаётгани, уларга 25 нафар педагог ҳамда 10 нафар ишлаб чиқариш таълими устаси дарс бераётгани маълум қилинди.

2025 йил якунларига кўра техникумда таълим сифати кўрсаткичлари бўйича муайян натижаларга эришилган. Хусусан, ўқувчиларнинг бандлик даражаси 82,6 фоизни ташкил этган бўлиб, мазкур кўрсаткич бўйича муассаса вилоятда 5-ўринни эгаллаган.

Вазир техникумдаги амалиёт устахоналари фаолияти билан ҳам танишди. Жумладан, ўқувчиларнинг тикувчилик ва пазандачилик йўналишларида амалий кўникмаларни эгаллаши учун ташкил этилган ўқув-ишлаб чиқариш хоналаридаги машғулотлар кўздан кечирилди. Ушбу устахоналарда ўқувчилар касбий кўникмаларини мустаҳкамлаб, келгусида меҳнат бозорида талаб юқори бўлган мутахассисликларни эгалламоқда.

Шунингдек, 2026 йилда техникумда таълим сифати кўрсаткичларини ошириш, дуал таълим улушини кенгайтириш, янги касб йўналишларини жорий этиш ҳамда моддий-техник базани мустаҳкамлаш бўйича режалар белгилаб олингани таъкидланди.

Шунингдек, Қ.Шарипов техникумда амалга оширилаётган қурилиш ишларини кўздан кечириб, таълим сифатини ошириш, дуал таълимни кенгайтириш, ўқувчиларнинг амалиёт ва ишга жойлашиш имкониятларини янада кўпайтириш бўйича мутасаддиларга тегишли топшириқлар берди.