Давлат хавфсизлик хизмати ва Иқтисодий жиноятларга қарши курашиш департаменти ходимлари Наманган вилоятида ноқонуний йўллар билан зиёрат ташкил этмоқчи бўлган шахснинг фаолиятига чек қўйишди.

Тафсилотларга кўра, Наманган шаҳрида яшовчи, 1984 йилда туғилган шахс Чуст туманида истиқомат қилувчи 4 нафар фуқаронинг ишончига кирган. У фуқароларни «Ҳаж-2026» мавсумида муқаддас зиёратга юбориш эвазига жами 26 минг АҚШ доллари талаб қилган.

Ўтказилган тезкор тадбир давомида гумонланувчи сўралган пулдан 6 минг АҚШ долларини олаётган вақтида ашёвий далиллар билан ушланди.

Ҳозирда мазкур шахсга нисбатан Ўзбекистон Республикаси Жиноят кодексининг 168-моддаси (фирибгарлик) 4-қисми «а» банди билан жиноят иши қўзғатилган. Тергов ҳаракатлари олиб борилмоқда.

«Ҳаж» тадбири фақатгина Ўзбекистон Республикаси Дин ишлари бўйича қўмитаси ва Саудия Арабистони Подшоҳлиги Ҳаж вазирлиги ўртасидаги келишув асосида, Ўзбекистон мусулмонлари идораси томонидан расмий равишда амалга оширилади.

Ҳурматли фуқаролар, агар сизга муборак сафарга юбориш бўйича шубҳали таклифлар билдирилса, ДХХнинг 1520 қисқа рақамига мурожаат қилинг. Шахсингиз сир сақланиши кафолатланади.