АҚШда Венесуэла президенти Николас Мадурони қўлга олиш амалиётида иштирок этган ҳарбий хизматчи қўлга олинди. У Мадуронинг ҳокимиятдан кетишига маблағ тикиб, 400 минг доллардан ортиқ ноқонуний даромад олганликда гумон қилинмоқда. Бу ҳақда Адлия вазирлиги маълумотларига таяниб, ABC News хабар берди.

Тергов маълумотларига кўра, Ван Дайк исмли ҳарбий Президент Дональд Трамп Мадуронинг қўлга олинганини эълон қилишидан бир неча кун олдин Polymarket платформасида 33 минг доллардан ортиқ маблағни турли прогнозларга тикиб, жами 409 минг доллардан зиёд фойда кўрган. Энг катта ставка — 32 537 доллар — Мадуронинг 31 январга қадар лавозимдан четлатилишига қаратилган бўлиб, 1 242 фоизлик фойда билан 404 222 доллар келтирган.

Айблов хулосасига кўра, Ван Дайк махфий давлат маълумотларидан шахсий манфаати йўлида ноқонуний фойдаланган, шунингдек, давлатга тегишли ёпиқ ахборотни ўзлаштириш, молиявий фирибгарлик ва электрон алоқа орқали фирибгарлик каби моддалар бўйича айбланмоқда. У, бундан ташқари, изларни йўқотиш мақсадида Polymarket ҳисобини ўчиришга ва криптовалюта аккаунтига боғланган электрон почтани ўзгартиришга урингани айтилмоқда.

Мазкур иш АҚШда тахминий савдо платформаларида инсайдер савдосига қарши биринчи жиноий таъқиб сифатида баҳоланмоқда. Polymarket компанияси шубҳали операциялар ҳақида ҳуқуқ-тартибот идораларига хабар берганини ва тергов билан ҳамкорлик қилганини маълум қилди. Шу билан бирга, ушбу бозорлар — жумладан Kalshi ва бошқа платформалар — атрофида инсайдер маълумотлардан фойдаланиш хавфи юзасидан хавотирлар кучаймоқда.

Президент Дональд Трамп мазкур ҳолатни изоҳлар экан, уни бейсболчи Пит Роузнинг ўз жамоасига пул тикиши билан қиёслади ва бундай амалиётлардан норозилигини билдирди. Унинг сўзларига кўра, замонавий дунё тобора “казино”га ўхшаб бормоқда, башорат бозорлари эса янги, аммо мураккаб ҳуқуқий масалаларни келтириб чиқармоқда.