Ўзбекистон халқ артисти Зинаида Соловёва 87 ёшида вафот этди. Бу ҳақда Маданият вазирлиги хабар берди.

Соловёва ярим асрга яқин меҳнат фаолияти давомида юксак профессионаллик, бетакрор актёрлик маҳорати, ижрочи сифатида беназир истеъдоди, баланд ва чиройли овози (лирик сопрано) билан мухлислар қалбидан ўрин олди.

Ўзбекистон давлат мусиқали комедия (оперетта) театридаги фаолияти давомида актриса қатор классик ва замонавий асарларда етмишдан ортиқ ролларни ижро этган.

«У театр соҳасини ривожлантиришда фидокорона хизмат қилиб, жонкуяр ҳамда самимий инсон сифатида барчамизнинг қалбимизда мангу яшайди. Маданият вазирлиги жамоаси Зинаида Соловёванинг оила аъзолари ва яқинларига чуқур ҳамдардлик билдиради», дейилади вазирлик хабарида.