Украина дрон ёрдамида Санкт-Петербург шаҳридаги бир қатор объектларга зарбалар берди. Мазкур ҳужумдан кейин шаҳар осмонида қуюқ тутун булутлари кўтарилган.

Санкт-Петербург губернатори Александр Бегловнинг маълум қилишича, шаҳарнинг учта туманидаги инфратузилма объектларига зарба берилган. Ҳодиса оқибатида жабрланганлар бор, аммо ҳалок бўлганлар ҳақида маълумот берилмаган.

Украина президенти Владимир Зеленский мазкур ҳужумга муносабат билдирар экан, зарбаларнинг асосий нишони нефть терминали бўлганини таъкидлаган.

Маълумот учун, айни пайтда Санкт-Петербург шаҳрида халқаро иқтисодий форум ўтказилмоқда ва шаҳарда кўплаб хорижий меҳмонлар йиғилган. Таҳлилчилар, дрон ҳужумлари атайлаб шу вақтга тўғриланган бўлиши мумкинлигини айтмоқда.

Ҳарбий блогерларнинг таъкидлашича, ёнғинга учраган нефть терминали форум ўтказилаётган майдондан тахминан 17 километр узоқликда жойлашган. Форум иштирокчиларининг асосий қисми етиб келадиган Пулково халқаро аэропорти эса ушбу объектга янада яқин ҳудудда жойлашган.

Маълумотларга кўра, ҳужумга учраган нефть терминали Россиянинг нефть ва бензин маҳсулотларини сақлаш ҳамда экспорт қилиш бўйича энг йирик объектларидан бири ҳисобланади. У ердан нефть маҳсулотлари дарё транспорти, темир йўл ва автомобиль йўллари орқали ташилади. Терминалнинг йиллик ўтказиш қуввати 12,5 миллион тоннани ташкил этади.

Украина томонининг айтишича, нефть терминалидан ташқари Кронштадт шаҳридаги ҳарбий объектлар ҳамда Тамбов вилоятидаги қурол-яроғ ишлаб чиқариш заводига ҳам зарбалар берилган.