Олий Мажлис Қонунчилик палатасидаги ЎзЛиДеП фракцияси йиғилишида дастлаб Президентимизнинг шу йил 24 февраль куни мамлакатимиз ёшлари билан мулоқотида илгари сурилган ташаббусларнинг аҳамияти ҳақида сўз юритилди.

Депутатлар мазкур учрашув ҳақида ўз фикр-мулоҳазаларини билдирар экан, давлатимиз раҳбари томонидан ёшлар тадбиркорлигини қўллаб-қувватлашга қаратилган молиявий имкониятлар кенгайтирилаётганини алоҳида қайд этдилар. Хусусан, қўшимча маблағлар, катта миқдордаги имтиёзли кредитлар ва стартаплар учун инвестиция киритишга рухсат берилиши йигит-қизларимизни ўз бизнес ғоясини амалга оширишда муҳим омил бўлишини таъкидладилар.

Ҳар бир ҳудудда ёшлар бизнес инкубаторлари ташкил этилиб, ғоядан тайёр маҳсулотгача бўлган йўлда комплекс кўмак кўрсатилиши белгилангани, бухгалтерия, маркетинг, бозорга чиқиш ва бизнес режалаштириш бўйича амалий ёрдамлар ёш тадбиркорлар учун мустаҳкам пойдевор бўлиб хизмат қилиши урғуланди.

— Ёшлар билан мулоқотда уларнинг таклиф ва ташаббуслари диққат билан тинглангани, айтилган муаммолар жойида ҳал этилгани Янги Ўзбекистон ёшларининг ислоҳотларга дахлдорлиги ва хайрихоҳлигини оширди, — деди фракция аъзоси Адҳамбек Исмоилов. — Бу ўз навбатида, ёшларнинг билимли, рақобатбардош ва иқтисодий фаол бўлиб камол топишига хизмат қилади. ЎзЛиДеП ҳам ёшлар ташаббусларини қўллаб-қувватлаш, инновация ва тадбиркорлик орқали янги иш ўринлари яратишни ўз фаолиятининг устувор йўналиши, деб билади. Зотан, ёшлар — мамлакатимиз тараққиётининг энг ишончли таянчидир.

Йиғилишда давлатимиз раҳбарининг 26-27 февраль кунлари Сурхондарё вилоятига ташрифининг якунлари муҳокама қилиниб, бу борада ЎзЛиДеП фракцияси олдида турган муҳим вазифалар белгилаб олинди.

Фракция аъзолари ушбу ташриф аҳолига янада қулай шароит яратиш ва инсон қадрини улуғлаш йўлида унутилмас воқеаларга бой бўлганлигини, айниқса, белгилаб берилган аниқ йўналишлар ҳудудни ҳар томонлама ривожлантириш, иқтисодий салоҳияти юқори, инвестициявий жозибадор ва аҳолиси фаровон ҳудудга айлантиришга муҳим пойдевор бўлишини таъкидладилар.

Шундан келиб чиқиб, маҳаллий Кенгашлар депутатлари билан биргаликда ташриф давомида илгари сурилган ташаббусларни ҳаётга татбиқ этиш устидан таъсирчан депутат назоратини таъминлаш, ушбу жараёнда янада фаол ва ташаббускор бўлиш лозимлиги урғуланди.

Депутатлар жорий йилнинг 26-28 февраль кунлари фракция аъзоларининг сайлов округларида учрашувларининг якунларини ҳам кўриб чиқдилар.

Маълум қилинганидек, сайлов округларида депутатлар томонидан жами мингга яқин учрашув ташкил этилиб, 1324 та хонадон, 816 та МФЙ, 834 та тадбиркорлик субъекти ҳамда 719 та ижтимоий соҳа объектига ташриф буюрилган. Сайловчилар билан юзма-юз мулоқот ўтказилиб, 1008 нафардан ортиқ фуқаро қабули ташкил этилган.

— Халқ билан яқиндан мулоқот қилиш мақсадида февраль ойининг охирги ҳафтасида сайлов округларида бўлиб, фуқаролар билан учрашдик, — деди фракция аъзоси Одинахон Отахонова. — Учрашувларимиз давомида энг аввало, давлатимиз раҳбарининг ёшлар билан мулоқотида илгари сурилган қатор ташаббусларнинг аҳамиятини йигит-қизларимизга етказдик. Шунингдек, аниқланган айрим масалалар мутасаддилар билан биргаликда ҳал этилди.

Йиғилишда кун тартибидан ўрин олган барча масалалар юзасидан тегишли қарорлар қабул қилинди.