Баҳор нафаси уфуриб турган шу кунларда кўҳна Бухоро сайёҳлар билан тобора гавжумлашмоқда. Сўлим Лабиҳовуз, донишмандмонанд Арк қўрғони, Пойи Калон мажмуаси бўйлаб ўтган йўлакларда қулоққа инглиз, испан, рус, француз, хитой, япон, корейсча сўзлар чалинади. Осори атиқаларни томоша қилиб, ҳайратга тушган, бир олам таассуротлар оғушида юрган юзлаб сайёҳларни кўриб кўнгилдан бу тинчлик-осойишталик неъмати, деган ўй кечади. Эътиборни меҳмонлар билан хорижий тилларда эмин-эркин сўзлашаётган вилоят хавфсиз туризмни таъминлаш бошқармаси ходимлари тортади.

— Бошқармамиз республика Вазирлар Маҳкамасининг «Бухоро, Самарқанд, Хива ва Шаҳрисабз шаҳарларида хавфсиз туризмни таъминлаш чора-тадбирлари тўғрисида»ги қарорига мувофиқ ташкил этилган, — дейди бошқарма масъул ходими, катта лейтенант Зарнигор Тиллаева. — Кадрлар танлашда ходимларнинг хорижий тилларни билишидан ташқари касбий тайёргарлиги, маънавий дунёсининг нечоғли бойлиги каби мезонларга таянилган. «Хавфсиз туризм» дастури асосида ишлаяпмиз. Меҳмонларнинг эмин-эркин саёҳат қилишлари учун зарур барча қулайликлар мавжуд. Уларнинг ўзларини ўз уйларидагидек ҳис этишларини кўриш биз учун ҳам мароқли. Муҳими, сайёҳлар юртимиздан мамнун ҳолда қайтишмоқда.

Дарҳақиқат, туристларнинг тинч ва хотиржам сайру саёҳат қилишлари, халқимизнинг бой маданий ва маънавий меросидан баҳраманд бўлишлари учун замонавий шарт-шароитлар муҳайё этилган. Кўҳна шаҳарда ўрнатилган ўнлаб видеокузатув, тепловизор мосламалари, алоқа ташвиш тугмалари, автомобиль тезлигини аниқлайдиган ускуналар ҳамда хушмуомала, чеҳраси ҳамиша очиқ ходимлар хорижий сайёҳларнинг хавфсизлигини таъминлашга хизмат қилмоқда.

Айтиш жоизки, биргина ўтган йилда вилоятга дунёнинг турли давлатларидан 2,7 миллион нафар турист келди.

Истам ИБРОҲИМОВ, «Халқ сўзи».