Юртимизда навқирон ва ёш авлод вакилларининг замонавий билим ва касб-ҳунарларини пухта эгаллашлари, хусусан, рақамли технологиялар соҳасида юқори малакали мутахассислар бўлиб етишишлари учун кенг шароитлар яратилмоқда. Жиззах вилоятининг сўлим гўшаларидан бири – Зомин туманида фойдаланишга топширилган янги «IT-шаҳарча» бунинг ёрқин исботи бўлди.

IT Парк Зомин туман бўлими мажмуасида барпо этилган мазкур рақамли билимлар масканининг очилишига Рақамли технологиялар вазирлиги раҳбарияти, вилоят, туман ҳокимликлари масъуллари, депутатлар, соҳа мутахассислари ва кенг жамоатчилик вакиллари иштирок этишди.

— Мазкур лойиҳа чекка ҳудудлардаги йигит-қизларнинг замонавий ахборот технологиялари ва сунъий интеллект оламига кириб келишлари учун имкониятлар эшигини очади, — дейди Халқ депутатлари Зомин тумани кенгаши депутати Гулчеҳра Махсудова. — Бугунги кунда ёшлардан нафақат ўз соҳасини билиш, балки IT-технологиялар ва хорижий тилларни мукаммал эгаллашни ҳам талаб этилмоқда. Мазкур янги маскан маҳаллалардаги ва қишлоқлардаги истеъдодли болаларнинг салоҳиятини юзага чиқаришга хизмат қилади, албатта.

Янги мажмуа келгусида Зомин туманининг рақамли тараққиёт марказларидан бирига айланиб, ёшларнинг замонавий билим ва кўникмаларни эгаллаши, инновацион лойиҳаларни амалга ошириш, стартапларни ҳаётга татбиқ қилиш, ахборот технологиялари ҳамда сунъий интеллект соҳаларида юқори натижаларга эришиши учун мустаҳкам замин яратади.

Толибжон ЭРГАШЕВ, «Халқ сўзи».