Бугунги кунда дуал таълим тизими ёш мутахассисларни тайёрлашда муҳим аҳамият касб этмоқда. Назарий билимни амалиёт билан уйғунлаштириш орқали талабалар ўз соҳасини чуқурроқ англайди, иш жараёнига эртароқ мослашади. Президент ташаббуслари ва ҳудудий дастурлар ижроси доирасида Балиқчи туманида ҳам бу борада муҳим қадам ташланиб, «Сортепа» маҳалласидаги «Сокин савдо сервис» МЧЖ ташаббуси билан дуал таълим тизими амалиётга жорий этилди. Лойиҳа Андижон қишлоқ хўжалиги институти билан ҳамкорликда амалга оширилмоқда. Унда ветеринария кафедраси ўқитувчилари ҳамда 60 нафардан ортиқ талабалар иштирок этмоқда.

— Соҳанинг илмий-назарий асосларини иш жараёни билан боғлаб ўрганмоқдамиз, — дейди институт талабаси Дилшодбек Раҳмонов. — Дуал таълим бизга жуда манзур бўлмоқда. Сабаби, дарсда олган билимларимизни шу ернинг ўзида амалда қўллаш имконияти яратилмоқда. Бу бизга келажакда малакали мутахассис бўлишимизга катта ёрдам беради.

Шунингдек, иштирокчилар замонавий тажрибалар, илғор ёндашувлар ва инновацион технологиялар билан яқиндан танишмоқда. Бу эса таълим жараёни самарадорлигини ошириш, талабаларнинг билим ва кўникмаларини мустаҳкамлашга хизмат қиляпти. Мутахассисларнинг фикрича, бундай лойиҳалар ҳудудларда кадрлар салоҳиятини юксалтиришда муҳим ўрин тутади.

Саминжон ҲУСАНОВ, «Халқ сўзи».