Белград шаҳрида Ўзбекистон ва Сербия парламентлараро ҳамкорлик гуруҳлари аъзоларининг учрашуви бўлиб ўтди.

Мулоқотда Ўзбекистон ва Сербия ўртасидаги парламентлараро муносабатларнинг бугунги ҳолати ҳамда устувор йўналишлари хусусида фикр алмашилди.

Кейинги йилларда икки мамлакат ўртасидаги сиёсий мулоқот ва парламентлараро алоқалар изчил ривожланиб бораётгани қайд этилди. Шунингдек, парламентлараро ҳамкорлик гуруҳлари икки томонлама муносабатларни мустаҳкамлашда муҳим ўрин тутаётгани таъкидланди.

Учрашувда парламентларнинг раҳбарияти ва қўмиталари ўртасидаги алоқаларни кенгайтириш, қонун ижодкорлиги, парламент назорати ҳамда таҳлилий-тадқиқот фаолияти соҳаларида тажриба алмашиш масалалари ҳам муҳокама қилинди.

Шу билан бирга, халқаро парламент ташкилотлари доирасида ҳамкорликни фаоллаштириш, ўзаро ташрифлар ва қўшма тадбирларни мунтазам ташкил этиш масалаларига ҳам алоҳида эътибор қаратилди.

Ўзбекистон Республикаси Олий Мажлиси Сенати ва Сербия Республикаси Халқ йиғилиши ўртасида парламентлараро ҳамкорлик тўғрисида имзоланган Англашув меморандумининг алоҳида аҳамияти қайд этилди. Таъкидланганидек, ҳужжат парламентлараро мулоқотни янада ривожлантириш, қонун ижодкорлиги фаолиятида тажриба алмашишни кенгайтириш, шунингдек, халқаро парламент ташкилотлари доирасидаги ҳамкорликни мувофиқлаштириш учун мустаҳкам ҳуқуқий ва ташкилий асос яратади.

Томонлар парламентлараро ҳамкорликни янада мустаҳкамлаш, ўзаро манфаатли ташаббусларни қўллаб-қувватлаш ва амалий мулоқотни давом эттиришга тайёр эканликларини билдирди.