Олий Мажлис Қонунчилик палатаси Коррупцияга қарши курашиш ва суд-ҳуқуқ масалалари қўмитасининг йиғилишида Адлия вазирлиги раҳбариятининг 2025 йил учун белгиланган самарадорлик кўрсаткичларининг (KPI) бажарилиш ҳолати юзасидан ахбороти эшитилди.

Таъкидланганидек, Президентимизнинг «Республика ва маҳаллий ижро этувчи ҳокимият органлари ҳамда хўжалик бирлашмалари фаолияти самарадорлигини баҳолаш тизимини такомиллаштириш чора-тадбирлари тўғрисида»ги Фармонида Олий Мажлис Қонунчилик палатасига республика ижро этувчи ҳокимият органлари ва хўжалик бирлашмалари раҳбарлари ҳамда ўринбосарларининг самарадорлик кўрсаткичлари бажарилиши юзасидан ҳисоботларини эшитиб бориш тавсия этилган.

Мазкур Фармон билан республика ва маҳаллий ижро этувчи ҳокимият органлари раҳбарлари фаолиятини аниқ мезонлар асосида баҳолаш тизими жорий этилган бўлиб, бу давлат бошқарувида натижадорлик, очиқлик ва шахсий масъулиятни кучайтиришга хизмат қилаётганлиги алоҳида қайд этиб ўтилди.

Мажлисда юқорида кўрсатилган вазифаларнинг ижросини таъминлаш мақсадида Адлия вазирлиги раҳбарияти томонидан самарадорлик кўрсаткичларининг ҳар бир соҳалар кесимида бажарилиши юзасидан депутатларга батафсил ахборот берилди.

Жумладан, норматив-ҳуқуқий ҳужжатларни мақбуллаштириш ва уларнинг сонини қисқартириш, тартибга солиш таъсирини баҳолаш тизимини кенг жорий этиш, коррупцияга қарши экспертиза ҳажмини ошириш, давлат хизматларини соддалаштириш ва рақамлаштириш, адвокатура, суд-экспертиза ҳамда интеллектуал мулк соҳаларини ривожлантириш, «ижро.гов.уз» тизими орқали ижро интизомини таъминлаш; архив ҳужжатларини рақамлаштириш каби йўналишларда амалга оширилган ишлар ҳақида ахборот берилди.

Маълумотларга кўра, 2025 йил учун вазир ва унинг ўринбосарлари учун белгиланган самарадорлик кўрсаткичлари тўлиқ бажарилган. Давлат хизматларини соддалаштириш, лицензиялаш ва рухсат бериш тартиб-таомилларини қисқартириш, интеллектуал мулк объектларини рўйхатдан ўтказиш ҳажмини ошириш ҳамда ҳуқуқий тарғиботни кучайтириш борасида сезиларли натижаларга эришилган.

Қўмита аъзолари томонидан кўрсаткичларнинг нафақат белгиланган миқдорларига эришилиши, балки уларнинг сифатли бажарилиши ҳолати атрофлича муҳокама қилинди. Хусусан, амалга оширилган ишларнинг аҳоли ва тадбиркорлик субъектлари учун яратилган қулайликларга, ҳуқуқий муҳитнинг яхшиланишига, бюрократик тўсиқларнинг камайишига таъсири юзасидан саволлар кўтарилди. Масъуллар томонидан атрофлича жавоблар берилди.

Эшитув давомида эришилган натижалар билан бирга ечимини кутаётган айрим масалалар борлиги таъкидланиб, уларни бартараф қилиш, тизимни янада такомиллаштириш бўйича таклифлар берилди.

Якунда қўмитанинг тегишли қарори қабул қилинди.