Давлат хавфсизлик хизматининг Чегара қўшинлари ва Тошкент вилояти бўйича бошқармаси ходимлари бошқа ҳуқуқни муҳофаза қилувчи органлар билан ҳамкорликда гиёҳвандлик воситаларининг ноқонуний айланмаси ҳамда контрабандасига қарши қаратилган йирик тезкор тадбир ўтказди.

Тезкор тадбир давомида «Тошкент – Фарғона» йўналишида ҳаракатланиб келаётган «Tracker» русумли транспорт воситаси йўл-патрул хизмати масканида тўхтатилди. Фарғона шаҳрида яшовчи, 1990 йилда туғилган ва муқаддам Жиноят кодексининг 166-моддаси (талончилик) билан судланган фуқаро бошқарувидаги ушбу автомобил холислар иштирокида кўздан кечирилди.

Машина салони текширилганда, дастлаб ҳайдовчининг ўз истеъмоли учун сақлаб қўйган 1,72 грамм гиёҳвандлик моддаси борлиги аниқланди. Кенгайтирилган қўшимча текширувлар давомида эса транспорт воситасининг юкхонасидан жами 8 килограмм 913 грамм «гашиш» моддаси топилиб, процессуал тартибда олиб қўйилди.

Тезкор суриштирув ва терговга қадар текширув жараёнида мазкур шахс ушбу йирик ҳажмдаги «ажал оғуси»ни қўшни давлатдан Тошкент вилояти ҳудудига контрабанда йўли билан ўтказган наркокурьерлардан қабул қилиб олгани ва доимий яшаш манзилига олиб кетаётгани маълум бўлди.

Ҳозирда мазкур ҳолат юзасидан ушбу фуқарога нисбатан жиноят иши қўзғатилиб, тергов ҳаракатлари олиб борилмоқда.