Сурхондарё вилоятида миллий маданият ва бой фольклор меросимизни кенг тарғиб этишга қаратилган йирик маданий тадбир — «Бойсун баҳори» халқаро фольклор фестивали ўз фаолиятини бошлади.

Мазкур фестивал «Бойсун баҳори» туризм мажмуасида ўн кун давомида ўтказилади. Бу ерга келган маҳаллий ва хорижлик меҳмонлар юртимизнинг ноёб анъаналари, халқ оғзаки ижоди намуналари, миллий ўйинлар ҳамда ҳунармандчилик санъатининг энг сара кўринишларидан баҳраманд бўлиш имкониятига эга бўладилар. Шу орқали фестивал нафақат маданий муҳитни бойитади, балки ҳудуднинг туризм салоҳиятини янада юксалтиришга, Бойсунни халқаро фольклор марказларидан бири сифатида кенг тарғиб қилишга хизмат қилади.

Бугун мазкур тадбир доирасида Бойсун туманида оммавий ахборот воситалари вакиллари иштирокида матбуот анжумани ташкил этилди.

Анжуманда Ўзбекистон Республикаси Маданият вазирлиги, Туризм қўмитаси, Сурхондарё вилояти ҳокимлиги мутасаддилари, шунингдек, фестивалда иштирок этаётган хорижий делегациялар ва фольклор жамоалари, оммавий ахборот воситалари вакиллари, блогерлар ҳамда фаоллар иштирок этдилар.

Тадбир давомида фестивалнинг мазмун-моҳияти, унинг халқаро майдондаги нуфузи, миллий маданий меросимизни асраб-авайлаш ва кенг тарғиб этиш борасида амалга оширилаётган ишлар ҳақида батафсил маълумотлар берилди.

Шу билан бирга, фестивални юқори савияда ташкил этиш, меҳмонлар учун яратилган қулай шарт-шароитлар ҳамда хавфсизлик чоралари юзасидан атрофлича тушунтиришлар берилди. Журналистлар ўзларини қизиқтирган саволларга мутасаддилардан батафсил жавоб олдилар.

Таъкидланганидек, мазкур фестивал турли миллат ва элат вакиллари ўртасида маданий мулоқотни кенгайтириш, ўзаро ҳамжиҳатликни мустаҳкамлаш ҳамда юртимизнинг бой номоддий маданий меросини жаҳон миқёсида кенг тарғиб этишга хизмат қилади.

Фарҳод ЭСОНОВ, «Халқ сўзи».