Москвада апрель охирида кучли қалин қор ёғиши кузатилди. Шимолий Атлантика циклони таъсирида Россия пойтахтида бир кечада ойлик ёғин меъёрининг ярмидан кўпи ёғди, ҳаво ҳарорати эса нол даражадан пастга тушди. «Метео» прогноз маркази раҳбари Александр Шуваловнинг маълум қилишича, қор ёғишининг энг кучли босқичи душанба тонгида ўтган ва у аста-секин сусайган ҳолда чоршанбагача давом этади.

Қор ёғиши ва кучли шамол оқибатида шаҳарнинг турли ҳудудларида қарийб 50 та дарахт қулаган. Фавқулодда хизматлар маълумотига кўра, икки автомобиль шикастланган, ҳайдовчилар жабрланмаган. Шунингдек, қулаган дарахтлардан бири турар жой биноси фасад ойнасига зарар етказган.

«Фобос» об-ҳаво маркази мутахассиси Евгений Тишковец Москвада бир сутка ичида ойлик меъёрнинг ярми миқдорида ёғин ёғганини билдирди. Ноқулай об-ҳаво сабаб «Внуково» аэропортида бир қатор рейслар кечиктирилди. Айрим шаҳар атрофи ва узоқ масофали поездлар ҳам кечикиб ҳаракатлангани хабар қилинди.

«Фобос» марказининг етакчи мутахассиси Михаил Леусга кўра, Москвада қор қалинлиги 55 йиллик рекордни янгилади. Эрталабга келиб шаҳарда қор қоплами 12 сантиметрга етган. Бу сана бўйича аввалги рекорд 10 сантиметр бўлиб, у 55 йил давомида сақланиб келган.

Пойтахт минтақасида хавфнинг тўқ сариқ даражаси эълон қилинди. Бўрон кучайиши, музламалар ва қуруқ момақалдироқ эҳтимоли борлиги айтилди. Кўплаб боғлар вақтинча ёпилди. Москвада электр самокатлар, велосипедлар ва ёзги шинали каршеринг автомобиллари ижараси ҳам тўхтатилди.

Шу билан бирга, «Роскосмос» «Макс» платформасида қор билан қопланган Москва акс этган сунъий йўлдош суратларини эълон қилди. Суратлар «Электро-Л» ва «Арктика-М» туркумидаги космик аппаратлар орқали олинган. Тасвирларда Москва билан бирга Россиянинг Европа қисми, деярли бутун Европа, Қора ва Ўрта ер денгизлари, Туркия, Шимолий Африка ҳамда Марказий Осиёнинг айрим ҳудудлари ҳам кўринган.