Бизнес ва тадбиркорлик олий мактабида «Ўзбекнефтгаз» АЖ тизимидаги корхона ва ташкилотлар раҳбарлари ҳамда маслаҳат кенгашлари аъзолари учун хотин-қизлар ва эркаклар учун тенг ҳуқуқ ҳамда имкониятларни таъминлаш масалаларига бағишланган ўқув дастурининг очилиш маросими бўлиб ўтди.

Тадбир Олий Мажлис Сенати томонидан Оила ва хотин-қизлар қўмитаси, БМТнинг Аҳолишунослик жамғармаси (UNFPA) ҳамда «Ўзбекнефтгаз» АЖ билан ҳамкорликда ташкил этилди.

Унда Олий Мажлис Сенатининг Ёшлар, хотин-қизлар, маданият ва спорт масалалари қўмитаси аъзоси Малика Кадирханова сўзга чиқиб, мамлакатимизда гендер тенгликни таъминлаш борасидаги давлат сиёсатининг мазмун-моҳияти, соҳадаги халқаро ёндашувлар ва энг яхши амалиётларни корпоратив муҳитга жорий этиш муҳимлиги ҳақида сўз юритди.

Ўқув курси давомида иштирокчиларга мамлакатимизда гендер тенгликни таъминлаш борасидаги давлат сиёсатининг устувор йўналишлари, халқаро ҳуқуқий нормалар ва хорижий давлатларнинг илғор тажрибаси ҳақида батафсил маълумот берилди. Хусусан, корпоратив бошқарувда гендер аудити ўтказиш, тизимда «family-friendly» тамойилларини жорий этиш ҳамда хотин-қизларнинг интеллектуал ва касбий салоҳиятини ошириш механизмларига алоҳида эътибор қаратилди.

Ўқув дастури якунида иштирокчилар ўз ташкилотларида инклюзив иш муҳитини шакллантириш ва гендер стратегияларини амалиётга жорий этиш бўйича тегишли кўникмаларга эга бўладилар.