Тошкент шаҳридаги Ўзбекистон халқаро анжуманлар саройида 8 март — Халқаро хотин-қизлар куни муносабати билан Зулфия номидаги Давлат мукофоти совриндорлари билан манфаатдор вазирлик ва идоралар раҳбарларининг учрашув тадбири бўлиб ўтди. Унда, Маданият вазирлиги вакиллари ҳам иштирок этишди.

Тадбирда мамлакатимизда иқтидорли ёш хотин-қизларни қўллаб-қувватлаш, уларнинг салоҳиятини рўёбга чиқариш, илм-фан, таълим, маданият, спорт ва бошқа соҳалардаги ютуқларини эътироф этиш масалаларига алоҳида эътибор қаратилди.

Маълумки, Ўзбекистон Республикаси Президентининг 1999 йил 10 июнда қабул қилинган ПФ–2326-сон Фармонига мувофиқ таъсис этилган Зулфия номидаги Давлат мукофоти ижтимоий фаоллиги, иқтидори ва ташаббускорлиги билан тенгдошларига ўрнак бўлиб келаётган 14 ёшга тўлган ва 30 ёшдан ошмаган иқтидорли хотин-қизларни рағбатлантириш мақсадида топшириб келинмоқда.

Қайд этилганидек, 2000–2025 йиллар давомида юртимиздаги 480 нафар иқтидорли хотин-қиз турли йўналишлардаги билим ва меҳнат фаолиятидаги ютуқлари учун мазкур нуфузли мукофотга сазовор бўлган. Яна 28 нафар иқтидорли ва ташаббускор хотин-қиз бугун ушбу сафга қўшилди.

Учрашувни Ўзбекистон Республикаси Бош вазири ўринбосари — Оила ва хотин-қизлар қўмитаси раиси Зулайҳо Махкамова очиб берди. У ўз сўзида Зулфия номидаги Давлат мукофоти совриндорлари мамлакатимиз тараққиётида фаол иштирок этаётган илғор ва ташаббускор ёшлар эканини алоҳида таъкидлади.

Шунингдек, Маданият вазирлиги вакиллари ҳамда бир қатор вазирлик ва идоралар вакиллари совриндор қизларни табриклаб, уларнинг келгусидаги фаолиятига муваффақият тиладилар ҳамда эсдалик совғалари топширилди.

Учрашув давомида иқтидорли ёш хотин-қизларни қўллаб-қувватлаш, уларнинг билим ва ташаббусларини амалиётга жорий этиш, давлат ва жамият тараққиётидаги фаол иштирокини янада кенгайтиришга қаратилган фикр-мулоҳазалар билдирилди.

Тадбир ёш авлод вакилларини илм-фан, маданият, спорт ва бошқа соҳаларда янада фаол бўлишга ундаши, шунингдек, мамлакатимизда хотин-қизларга яратилаётган имконият ва эътиборнинг яна бир ифодаси сифатида аҳамият касб этди.