Қашқадарё вилоятида 1 июнь – Халқаро болаларни ҳимоя қилиш куни муносабати билан қирққа яқин мактабгача таълим муассасалари фойдаланишга топширилди. Улар орасида Қарши давлат университети тасарруфидаги «UniKids» мактабгача таълим ташкилоти ҳам бор.

Лойиҳа қиймати қарийб 9 миллиард сўмни ташкил этган, 240 ўринли ушбу мактабгача таълим муассасасида энг замонавий андазалар асосида бунёд этилган. Бу ерда таълим жараёнлари ўзбек, рус ва инглиз тилларида олиб борилади. Таълим ва тарбия ишларига 24 нафар юқори малакали педагог ва махсус мутахассислар жалб этилган.

— Фаолиятимиз кластер тизими асосида йўлга қўйилган, — дейди муассаса мудираси Нодира Орипова. — Яъни бу ерда университетимизнинг Мактабгача таълим йўналиши талабалари учун дуал таълим тизими ҳам йўлга қўйилади. Бундан ташқари, докторантлар, мустақил тадқиқотчилар ўз илмий ишларини олиб боради. Бу эса бўлажак педагогларнинг назарий билимларини амалиёт билан уйғунлаштириш, фан, таълим ва ишлаб чиқариш интеграциясини янада мустаҳкамлашга хизмат қилади.

Муассаса нафақат болаларни мактаб таълимига пухта тайёрлаш, балки уларда ижтимоий, коммуникатив ва шахсий кўникмаларни ривожлантиришга ҳам хизмат қилади. Шу мақсадда муассаса қошида 4 та замонавий марказдан иборат лаборатория ташкил этилган бўлиб, улар болаларнинг ёш хусусиятларига мос дидактик материаллар ҳамда илғор ахборот технологиялари билан таъминланган.

Мутахассисларнинг таъкидлашича, 3-7 ёш оралиғидаги боланинг нутқи, тафаккури ва ижтимоий кўникмалари шаклланишида энг асосий давр ҳисобланади. Бу даврда берилган билим, таълим ва тарбия эса боланинг кейинги ҳаёти учун ниҳоятда муҳим аҳамиятга эга.

Шундан келиб чиққан ҳолда мамлакатимизда мактабгача таълим тизимини ривожлантиришга устувор аҳамият қаратилмоқда. Болаларни мактабгача таълимга қамраб олиш қамрови йил сайин ошиб боряпти. Биргина Қашқадарё вилояти мисолида оладиган бўлсак, 2017 йилда вилоятда 326 та боғча мавжуд бўлиб, қамров даражаси атиги 13 фоизни ташкил этарди. Бугунги кунда эса ҳудуддаги мактабгача таълим муассасалари сони 4500 га, қамров даражаси эса 80 фоизга яқинлашди.

Жаҳонгир БОЙМУРОДОВ, «Халқ сўзи».