Бугун, 2 июнь куни футбол бўйича Ўзбекистон миллий терма жамоаси Канада термасига қарши ўртоқлик ўйини ўтказди. Учрашув мезбонларнинг 2:0 ҳисобидаги ғалабаси билан якунланди.

Келинг, Ўзбекистон миллий терма жамоаси аъзоларининг бугунги ўйинини таҳлил қиламиз.

Учрашувда Ўзбекистон миллий терма жамоаси 49 фоиз тўп назоратига эга бўлди. Таъкидлаш жоизки, Канададек рақибга қарши бу ёмон натижа эмас.

Ўйин давомида Ўзбекистон миллий терма жамоаси аъзолари рақиб дарвозасига 5 та зарба йўллашди. Бу зарбалардан 2 таси дарвоза соҳасига аниқ борди.

Фабио Каннаваро шогирдлари ўйин давомида 443 та узатмани амалга оширишди. Улардан 350 таси ўз манзилига аниқ борди. Терма жамоамиз аъзоларининг узун узатмаларидан 57 фоизи, якунловчи узатмаларидан эса 38 фоизи ўз манзилига аниқ етиб бормади ёки рақиб футболчилари томонидан блокланди.

Энди асосий таркибда майдонга чиққан футболчиларимизга “Sofascore” неча баҳо қўйгани билан танишамиз.

Абдувоҳид Неъматов — 7 балл

Ўйин давомида 2 та сейв амалга оширди. Умумий узатмаларининг 90 фоизи аниқ чиқди. Узун узатмаларнинг аниқлиги бўйича 74 фоизлик натижа қайд этди.

Рустам Ашурматов — 6,3 балл

Умумий 7 та дуэлдан 4 тасида ютқазди. Узатмаларининг 82 фоизи аниқ чиқди. 15 марта тўпни йўқотди.

Абдулла Абдуллаев — 6,8 балл

Ўзи қатнашган дуэлларнинг 80 фоизида ғалаба қозонди. 2 марта рақибнинг хавфли ҳужумини олдини олди. Узатмаларининг 91 фоизи аниқ чиқди. Майдоннинг иккинчи қисмига узатган пасларининг ҳаммаси аниқ чиқди.

Абдуқодир Ҳусанов — 7,1 балл

8 марта дуэлларда ютди. 3 марта рақибнинг хавфли ҳужумини тўхтатди. Узатмаларининг 87 фоизи аниқ чиқди. Энг юқори балл айнан Ҳусановга берилди.

Фаррух Сайфиев — 6,3 балл

Кўплаб техник хатоларга йўл қўйди. Тезлик жиҳатдан муаммолари бор экани сезилди. Умумий узатмаларининг 14 таси аниқ чиқди. Бу 74 фоизлик кўрсаткич дегани. Ўзи қатнашган дуэлларнинг 6 тасида ютқазди.

Шерзод Насруллаев — 6,1 балл

Ўйинга киришиб кетиши осон бўлмади. Ҳужумга фойда келтиришга бўлган ҳаракатлари анча кам бўлди. Умумий узатмаларининг 68 фоизи аниқ чиқди. Бу унинг ҳар 3 та узатмасидан 1 таси хато бўлганини англатади.

Одил Ҳамробеков — 6,3 балл

Тўпни бошқаришда ва позиция танлашда хатоларга йўл қўйди. Тўп узатмаларининг 87 фоизи аниқ чиқди.

Отабек Шукуров — 5,9 балл

Ўйинни бошқаришда хатоларга йўл қўйди. Техника бўйича камчиликлари бор экани кўринди. Узатмаларининг 32 фоизи ноаниқ кетди. Энг паст балл ҳам айнан Отабекка қўйилди.

Азиз Ғаниев — 6,3 балл

23 дақиқа майдонда ҳаракат қилди. 7 та тўп узатмаси амалга оширди. Ҳаммаси аниқ чиқди.

Остон Ўринов — 6,5 балл

Ўзидан кутилган ўйинни кўрсата олмади. Узатмаларининг 70 фоизи аниқ чиқди. Рақиб дарвозасига бирорта зарба йўллай олмади.

Элдор Шомуродов — 6,6 балл

Жуда омадсиз ўйин ўтказди. 2 марта қулай имкониятлардан фойдалана олмади. Узатмаларининг 29 фоизи ноаниқ чиқди.

Умумий хулоса қилинса, Ўзбекистон миллий терма жамоаси ушбу ўйинда ўзидан кутилган ўйинни кўрсата олмади. Умид қиламизки, жамоамиз мундиалгача ўз хатолари устида ишлашга улгуради.