Илгари хабар берганимиздек, Олий Мажлис Сенати Раиси Танзила Нарбаева бошчилигидаги делегация Истанбул шаҳрида бўлди. Делегация аъзолари Парламентлараро иттифоқнинг 152-ассамблеяси доирасида турли мавзудаги дебатлар ва сессияларда иштирок этди.

Жумладан, Сенатнинг Фан, таълим ва соғлиқни сақлаш масалалари қўмитаси раиси ўринбосари, ПИ соғлиқни сақлаш қўмитаси раиси Орал Атаниязова «Соғлиқни сақлашни молиялаштиришда солиқлар орқали барқарорликни таъминлаш: парламентларнинг ўрни» мавзусидаги Парламентлараро иттифоқ ва Жаҳон соғлиқни сақлаш ташкилотининг қўшма сессиясида онлайн шаклда иштирок этди.

Муҳокама давомида соғлиқ учун зарарли маҳсулотларга солиқларни ишлаб чиқиш ва самарали жорий этишнинг аҳамиятига алоҳида эътибор қаратилди. Бундай чора-тадбирлар юқумли бўлмаган касалликлар даражасини пасайтиришга, аҳоли саломатлиги кўрсаткичларини яхшилашга, шунингдек, давлатнинг бюджет имкониятларини кенгайтиришга хизмат қилиши таъкидланди.

Сенатор, шунингдек, Парламентлараро иттифоқнинг «Инқироз шароитида аёллар, болалар ва ўсмирлар саломатлиги ҳамда фаровонлигини таъминлаш, тинчлик ва умид йўлида парламент ҳаракатлари» мавзусидаги семинарда иштирок этди.

Сенатор ўз нутқида халқаро тажриба алмашиш ва соғлиқни сақлаш хизматлари билан барчанинг қамраб олинишини таъминлаш бўйича мажбуриятларнинг мамлакатлар томонидан бажарилишини мониторинг қилишни кучайтириш муҳимлигини таъкидлади.

Бундан ташқари, сенатор, айниқса инқирозли вазиятларда, аёллар, болалар ва ўсмирларга йўналтирилган асосий тиббий хизматлар ва товарларни молиялаштириш ҳамда мазкур йўналишга инвестицияларни кенгайтириш зарурлигига алоҳида эътибор қаратди.