АҚШ Президенти Дональд Трамп Қўшма Штатлар Қуролли кучлари Уммон қўлтиғида денгиз блокадасини бузиб ўтишга уринган Эрон юк кемасини қўлга олганини маълум қилди. Бу ҳақдаги тегишли пост Truth Social ижтимоий тармоғида эълон қилинди.

«АҚШ Ҳарбий-денгиз кучларининг «USS Spruance» ракета қирувчиси Уммон қўлтиғида «Touska» кемасини тўхтатди ва уларга тўхташ талаби билан аниқ огоҳлантириш юборди. Эрон экипажи бўйсунишдан бош тортди, шунинг учун бизнинг ҳарбий кемамиз машина бўлинмасида тешик очиш орқали уларни тўхтатди. Ҳозирда АҚШ денгиз пиёдалари ушбу кемани назорат қилмоқда», — деб ёзди Америка етакчиси.

АҚШ Қуролли кучлари Марказий қўмондонлигининг билдиришича, қўлга олинган кема Эроннинг Бандар-Аббос порти томон ҳаракатланаётган бўлган.

Таъкидланишича, «Touska» экипажи олти соат давомида огоҳлантиришларга жавоб бермаган, шундан сўнг «USS Spruance» кеманинг машина бўлинмасига қарата «Mark 45» русумли 127 миллиметрли тўпдан бир неча бор ўқ узган.

Шундан сўнг «Touska» бортига денгиз пиёдалари чиқарилган.