Мамлакатимизда чорвачиликни ривожлантириш, ветеринария хизмати фаолиятини такомиллаштириш, эпизоотик барқарорликни таъминлаш бўйича комплекс чора-тадбирлар амалга оширилмоқда.

Бироқ сўнгги пайтларда айрим хорижий давлатларда чорва моллари ўртасида юқумли ва ўта хавфли эпизоотик касалликларнинг авж олиши билан боғлиқ ҳолатлар жамоатчилик ва шу соҳадаги тадбиркорлик субъектларида хавотир уйғотмоқда.

Чорва молларининг аксарият қисми аҳоли ва кичик чорвачилик фермер хўжаликларда сақланиши соҳада назоратнинг тарқоқлигини кўрсатади. Бу эса эпизоотик барқарорликни таъминлашга, аҳоли саломатлигига, озиқ-овқат хавфсизлигига таҳдид солиши мумкин.

Ҳайвонларнинг ўта хавфли юқумли касалликлари келиб чиқишини аниқлашга қаратилган тадбирлар устидан назоратни янада кучайтириш, уларни бошқа давлатлардан кириб келиши ва тарқалишининг олдини олиш долзарб масала ҳисобланади.

Юқоридагилардан келиб чиқиб, Сенатнинг Аграр, сув хўжалиги масалалари ва экология қўмитаси раиси ўринбосари Сайёра Абдикаримова Ветеринария ва чорвачиликни ривожлантириш қўмитаси раиси ўринбосари Шуҳрат Жабборовга сенатор сўров юборди.

Унда ҳудудларда ўтказилаётган ветеринария тадбирлари, ветеринария назорати, чорва молларини оммавий эмлаш қамрови, вакцина, биопрепаратлар ва бошқа воситалар билан таъминланганлик даражаси, ветеринария лабораторияларининг моддий-техника базаси, эпизоотик вазиятни прогноз қилиш, ҳайвонларни идентификация қилиш бўйича амалга оширилаётган ишлар ва соҳадаги муаммолар юзасидан тушунтириш бериш сўралган.