Сурхондарё вилоятида Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси ҳамда халқ депутатлари вилоят Кенгашининг қўшма мажлиси бўлиб ўтди.

Унда Қўмита аъзолари, ҳудуддан сайланган сенаторлар, халқ депутатлари Сурхондарё вилояти Кенгаши депутатлари, доимий комиссиялар аъзолари, вилоят ва туманлар ҳокимликлари раҳбарлари иштирок этди.

Мажлисда ҳудудга хорижий инвестицияларни жалб қилиш ва ўзлаштириш, маҳаллий маҳсулотлар экспортини кенгайтириш, логистика имкониятларидан самарали фойдаланиш ҳамда тадбиркор ва экспортчиларга яратилаётган шароитлар муҳокама қилинди. Мазкур масалалар юзасидан мутасадди раҳбарларнинг ахборотлари эшитилди.

Қайд этилганидек, давлатимиз раҳбари томонидан ҳудуднинг қулай географик жойлашуви ва ресурс салоҳиятидан самарали фойдаланиш, хорижий инвесторларни жалб қилиш бўйича кенг имкониятлар яратилмоқда. Хусусан, 2025 йилда 1,7 млрд доллар, жорий йилнинг биринчи чорагида 500 млн доллар миқдорида инвестициялар жалб қилинган. Ўтган йилда 834,2 млн долларлик 617 та лойиҳа ишга туширилиб, 17 мингта янги иш ўрни яратилган.

Шунингдек, 2025 йилда 480 млн долларлик, 2026 йилнинг биринчи чорагида эса 159,7 млн долларлик маҳсулотлар экспорт қилиниб, ўсиш суръатлари таъминланган. Ҳозирги кунда вилоятда 388 та корхона экспорт фаолиятига жалб этилган.

Экспорт амалиётларини соддалаштириш мақсадида «E-kontrakt» ахборот тизими жорий этилгани, шунингдек, Туркия, Хитой, Россия, БАА, Корея, Афғонистон ва бошқа давлатлар билан ҳамкорлик кенгайиб бораётгани таъкидланди.

Мажлисда инвестициявий жалб этувчанликни ошириш, экспортни қўллаб-қувватлаш ва мавжуд муаммоларни бартараф этиш юзасидан таклифлар ишлаб чиқилди. Сенаторлар томонидан инвестицияларнинг самарадорлигини ошириш, лойиҳалар ижросини кучайтириш, логистика рақобатбардошлигини юксалтириш ҳамда трансчегаравий иқтисодий алоқаларни ривожлантириш бўйича тегишли тавсиялар берилди.

Муҳокамалар якунида тегишли қарор қабул қилинди.