Аввалроқ Тошкент вилояти Олмалиқ шаҳрида ИИО ходими вояга етмаган қизга нисбатан ғайриқонуний хатти-ҳаракатлар содир қилганликда гумонланаётгани ҳақида хабар берилган эди. Вилоят Ички ишлар бош бошқармаси мазкур хабарда келтирилган маълумотлар ҳақиқатга тўғри келмаслигини маълум қилди.

Билдирилишича, олиб борилган суриштирувлар давомида ижтимоий тармоқларда тарқатилаётган хабарда келтирилган иддаолар мутлақо ҳақиқатга тўғри келмаслиги аён бўлган.

Аниқлик киритилишича, жорий йилнинг 27 апрель куни, соат тунги 00:40 да Оҳангарон шаҳар ИИБ ППХ ходимига, 22 ёшли таниши А.К. (аёл) қўнғироқ қилиб, ундан маслаҳат олиш заруратини айтиб чақирган.

ППХ ходими етиб борган вақтида аёл билан, унинг 14 ёшли қиз таниши бирга чиқиб, ходимнинг машинасига ўтирган. Шу вақтда 18 ёшли А.Х. (видео мурожаат йўллаган шахс) 4 нафар таниши билан келиб, ходимни ҳақоратлаб, жанжал кўтарган.

«У аслида 14 ёшли қизнинг ҳеч қандай қариндоши ҳисобланмайди», дейилади ИИББ хабарида.

Қайд этилишича, ҳолатда вояга етмаган қизнинг иштироки бўлганлиги сабабли, тўлиқ тафсилотлар ҳозирча очиқланмайди. Иш якунига кўра ёлғон ахборот тарқатган шахсларга нисбатан маъмурий, оғир оқибатларга олиб келган тақдирда жиноий жавобгарлик чоралари кўрилади.

Шу ўринда, бошқарма ОАВ вакилларига хабарда келтирилган важлар асл ҳолатга тўғри келмаслигини маълум қилиб, ушбу хабарни тарқатмасликни сўраган.

Бироқ хабарда ППХ ходимининг айнан нима сабабдан лавозимидан четлатилганига изоҳ берилмаган.