Буюк Британиянинг Оксфорд шаҳрида “Бўлиниш даврида инсонпарварлик” мавзуида сессия ўтказилди.

Филантропия ва ижтимоий таъсир соҳасида фаолият юритувчи халқаро экспертлар иштирокида бўлиб ўтган ушбу тадбирда “Маҳалла” хайрия жамоат фонди вакиллари иштирок этди.

Сессияда бугунги дунё қандай мураккаб босқичда тургани ҳамда филантропиянинг роли қандай бўлиши кераклиги очиб берилди.

Таъкидланганидек, бугунги кунда дунё ижтимоий тенгсизлик ва турли бўлинишлар даврини бошдан кечирмоқда. Шу нуқтада асосий савол қўйилди: филантропия мавжуд тизимни қўллаб-қувватлаш билан чекланадими ёки уни ўзгартиришга қодирми?

Экспертлар хулосасига кўра, замонавий филантропия, бу шунчаки ёрдам эмас, балки тизимли ўзгариш яратадиган куч. Муҳокама давомида бир нечта муҳим йўналишлар ажратиб берилди. Хусусан, филантропия янги ғояларни синаб кўриш ва риск қилиш имкониятига эга. Бу унинг энг катта афзалликларидан бири ҳисобланади. Шунингдек, самарали ечимлар маҳаллий даражада, яъни одамлар билан биргаликда ишлаш орқали юзага келади. Бу эса Ўзбекистондаги маҳалла тизимининг аҳамиятини янада оширади. Кўп пул ёки ресурс бўлиши шарт эмас, энг муҳими — ўша ресурсни тўғри жойга, ҳақиқий эҳтиёж бор ерга сарфлаш, хатоларни тан олиш ҳамда улардан хулоса чиқариш замонавий филантропиянинг муҳим тамойилига айланмоқда.

Сессияда кўтарилган масалалар, таклифлар соҳани чуқур англаш ва уларни амалий йўналишга ўтказиш имконини беради. Бу тажриба “Маҳалла” фонди учун глобал тенденцияларни олдиндан ҳис қилиш ва фаолиятни замон талабларига мос равишда ривожлантиришда муҳим аҳамиятга эга.

Шоҳсанам ЙЎЛДОШЕВА,

ЎзДЖТУ талабаси.