Олий Мажлис Қонунчилик палатасидаги Ўзбекистон Халқ демократик партияси фракцияси йиғилишида мамлакатимизнинг халқаро ташкилотларга аъзолигининг ижтимоий аҳамияти, айрим ҳудудлар чегараларидаги ўзгаришлар ва ушбу жойларда ижтимоий объектларнинг жойлашуви масалалари атрофлича кўриб чиқилди.

Йиғилиш кун тартибидан ўрин олган асосий масалалардан бири — «Хавфли ишлаб чиқариш объектларининг ва потенциал хавфли объектларнинг саноат хавфсизлиги тўғрисида»ги қонун лойиҳаси бўлди. Мазкур лойиҳа доирасида депутатлар томонидан аҳоли хавфсизлигини таъминлаш, хусусан, хавфли объектларнинг атроф-муҳит ва аҳоли саломатлигига таъсирини чуқур ўрганиш, аниқ ва амалий чора-тадбирларни белгилаш зарурлиги таъкидланди. Шу жиҳатдан, қонун нормаларининг самарали ишлаши учун уларни аниқ механизмлар билан мустаҳкамлаш лозимлиги қайд этилди.

Шунингдек, халқ депутатлари Кенгашлари фаолиятини такомиллаштиришга қаратилган қонун лойиҳаси ҳам қизғин муҳокама қилинди. Унда Кенгашлар ваколатларини аниқ белгилаш, жумладан, уларнинг қўшимча ваколатлари фақат қонун ҳужжатлари орқали тартибга солиниши назарда тутилмоқда.

Муҳокамалар жараёнида айрим нормалар юзасидан танқидий фикрлар ҳам билдирилди. Хусусан, депутат Сайёра Имомова томонидан ҳокимларнинг маҳаллий Кенгашларда депутатлик мақомини сақлаб қолиши манфаатлар тўқнашувига олиб келиши мумкинлиги қайд этилди ва ушбу нормани қўшимча муҳокама қилиш таклифи илгари сурилди.

Йиғилишда фракциянинг яқин режалари ҳам белгилаб олинди. Қайд этилганидек, яқин вақтларда депутатларнинг ҳудудлардаги ўрганишлари ташкил этилади. Ушбу ўрганишлар давомида мактаб ва мактабгача таълим муассасаларида ўқувчилар учун яратилаётган хавфсиз шароитлар, моддий-техник базанинг ҳолатига алоҳида эътибор қаратилади. Бу жараён маҳаллий Кенгашлар билан ҳамкорликда амалга оширилиши режалаштирилмоқда.

Якунда фракция кун тартибига киритилган қонун лойиҳаларини концептуал жиҳатдан қўллаб-қувватлади.