Ҳиндистон пойтахти Деҳлида кўп қаватли бинода юз берган ёнғин оқибатида камида 21 киши ҳалок бўлган, яна ўнлаб одамлар жароҳат олган. Бу ҳақда маҳаллий ҳуқуқ-тартибот органлари маълум қилди.

Маҳаллий ОАВ хабарларига кўра, қурбонларнинг аксарияти Жанубий Осиё давлатларидан келган хорижлик фуқаролар бўлиб, улар Ҳиндистонга даволаниш ёки даволанаётган яқинларига ҳамроҳлик қилиш мақсадида келган.

Дастлабки маълумотларга кўра, ёнғин содир бўлган бино яқин атрофдаги хусусий шифохонада даволанаётган беморлар ва уларнинг қариндошлари учун меҳмон уйи сифатида фаолият юритган.

Фавқулодда хизматлар томонидан 40 дан ортиқ киши қутқарилиб, шифохоналарга етказилган. Ёнғин содир бўлган пайтда бинода қанча одам бўлгани ҳозирча аниқ эмас. Ёнғин келиб чиқиш сабаблари ҳам ҳали аниқланмаган.

Ёнғин қисқа вақт ичида назоратга олинган бўлсада, ҳодиса жойида қутқарув ишлари давом этмоқда. Ёнғин хизмати вакили А.К. Маликнинг таъкидлашича, «ёнғин қисқа вақт ичида ўчирилган ва бино тўлиқ текширув учун полицияга топширилган».

Деҳли ҳукумати вакили Ашиш Соод мазкур бино меҳмон уйи сифатида фаолият юритиш учун зарур рухсатномаларга эга бўлган-бўлмаганини ўрганиш ишлари олиб борилаётганини маълум қилди. Қоидабузарликлар аниқланса, масъулларга нисбатан жиноий чора кўрилади.

Ҳиндистон Бош вазири Нарендра Моди ҳалок бўлганларнинг оила аъзоларига таъзия билдириб, уларга 200 минг рупий, жароҳатланганларга эса 50 минг рупий миқдорида моддий ёрдам ажратилишини эълон қилди.

Ижтимоий тармоқларда тарқалган видеоларда бинодан алангалар отилиб чиқаётгани, атрофда одамлар тўплангани акс этган. Гувоҳларнинг айтишича, ёнғин тез тарқалиб, юқори қаватлардаги одамлар қамалиб қолган. Маҳаллий аҳоли вакиллари фавқулодда хизматлар етиб келгунига қадар одамларни қутқаришга уринган. Баъзи фуқаролар юқори қаватлардан сакрашга мажбур бўлган.

Мутахассислар Ҳиндистонда бундай ёнғинлар тез-тез содир бўлишини қурилиш хавфсизлиги қоидаларига тўлиқ риоя этилмаслиги билан изоҳлашмоқда.