26:T7f3,

Сирдарёда боғча болаларини меъёридан ортиқ ташиётган «Damas» автомобиллари аниқланди. Бу ҳақида Таълим хабарлари Telegram-каналида маълумот берилди.

Унда айтилишича, Сирдарё вилояти Гулистон туманида ўтказилган назорат-рейд тадбирлари давомида бир нечта «Damas» русумли транспорт воситалари ҳайдовчилари боғча ёшидаги болаларни белгиланган меъёрдан ортиқ тарзда ташиб кетаётгани аниқланиб, ЙПХ инспекторлари томонидан тўхтатилган.

Аниқланишича, ҳайдовчилардан бири тумандаги мактабгача таълим ташкилотларидан бирининг 29 нафар тарбияланувчисини битта автомобилда олиб кетаётган бўлган.

Яна бир ҳолатда эса «Damas» транспорт воситасида 20 нафар боғча боласи ташилгани маълум бўлган. Қоидабузарлик ҳолатлари юзасидан ҳайдовчилар билан профилактик тушунтириш ишлари олиб борилган.

Уларга нисбатан Ўзбекистон Республикаси Маъмурий жавобгарлик тўғрисидаги кодексининг 128-моддаси 1-қисмига асосан маъмурий баённомалар расмийлаштирилган.