Эрон Ташқи ишлар вазирлиги вакили Исмоил Бақоий Ислом Республикаси мамлакатдан бойитилган уранни олиб чиқиб кетишга йўл қўймаслигини маълум қилди. Унинг сўзларидан Tasnim агентлиги иқтибос келтирмоқда.

Бақоий ушбу материални Қўшма Штатларга етказиб бериш варианти кўриб чиқилмаганини таъкидлади. Унинг сўзларига кўра, Эрон замини муқаддасдир, бойитилган уран ҳам шу каби (муқаддас) ҳисобланади.

Axios портали Вашингтон ва Теҳрон можарони тўхтатиш режасини муҳокама қилаётгани ҳақида хабар берганди. Суҳбатдошларнинг таъкидлашича, режа бандларидан бири Эроннинг 20 миллиард долларлик активларини музлатилган ҳолатдан чиқаришдир. Бунинг эвазига АҚШ Эрондан бойитилган уран захираларидан воз кечишни талаб қилмоқда.

Аввалроқ Америка етакчиси Дональд Трамп Ислом Республикаси «барчасига рози бўлганини», жумладан, бойитилган уранни олиб чиқиб кетишга ҳам кўнганини маълум қилган эди. У Теҳрон ушбу масала бўйича Вашингтон билан ҳамкорлик қилишини қайд этганди.