Жорий йилнинг 22 апрель куни Нью-Йорк шаҳрида Ўзбекистон ва Гвинея-Бисау ўртасида дипломатик алоқалар ўрнатиш тўғрисидаги Қўшма коммюнике имзоланди. Бу ҳақда «Дунё» ахборот агентлиги хабар берди.

Маълум қилинишича, ушбу муҳим ҳужжат Ўзбекистоннинг БМТдаги доимий вакили Улуғбек Лапасов ва Гвинея-Бисаунинг БМТдаги миссияси раҳбари Самба Сане томонидан имзоланган.

Учрашувда томонлар халқаро ташкилотлар, жумладан, БМТ ва унинг ихтисослашган муассасалари доирасида ҳамкорликни мустаҳкамлашдан манфаатдор эканини билдирган. Шунингдек, икки томонлама алоқаларнинг ўзаро манфаатли йўналишларини топиш бўйича ҳамкорликни фаоллаштиришга келишиб олинган.

Маълумот учун, Ғарбий Африка давлати бўлган Гвинея-Бисау Ўзбекистон дипломатик алоқалар ўрнатган 168-мамлакат бўлди.