Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО)нинг Ўзбекистондаги ваколатхонаси делегацияси Жиззах вилоятининг Ғаллаорол туманида жойлашган Лалмикор деҳқончилик илмий-тадқиқот институти фаолияти билан танишди.

ФАОнинг Ўзбекистондаги вакили ўринбосари Шерзод Умаров бошчилигидаги делегация институт директори Бунёд Мамарахимов билан учрашди. Ташриф давомида институтнинг бой илмий мероси ҳам эътироф этилди. Қайд этилганидек, ушбу илмий муассаса фаолияти 1913 йилда Самарқанд вилоятининг Каттақўрғон шаҳри яқинида ташкил этилган Зарафшон тажриба даласидан бошланган бўлиб, кейинчалик турли босқичларда ривожланиб, бугунги кунда лалмикор деҳқончилик йўналишидаги етакчи илмий масканлардан бирига айланган.

Амалга оширилган ташриф доирасида делегация аъзолари институтнинг илмий фаолияти, қишлоқ хўжалиги экинлари селекцияси йўналишида эришилган ютуқлар ҳамда лалми деҳқончилик шароитида қўлланилаётган замонавий ва инновацион ёндашувлар ва технологиялар билан таништирилди. Хусусан, қурғоқчиликка чидамли экин навларини яратиш, ҳосилдорликни ошириш ва иқлим ўзгаришларига мос технологияларни жорий этиш бўйича олиб борилаётган илмий тадқиқотлар ҳақида атрофлича маълумот берилди. Шунингдек, институтнинг кўп йиллик илмий-амалий тажрибаси, лалми ҳудудларда қишлоқ хўжалигини ривожлантириш ва озиқ-овқат хавфсизлигини таъминлашдаги муҳим ўрни алоҳида таъкидланди.

Институтнинг тажриба хўжалиги ерларини кўздан кечириш давомида делегация аъзолари буғдой, арпа, махсар ва нўхат экинларининг илғор селекция ишлари натижасида яратилган янги навлари билан батафсил танишди. Мутахассисларнинг таъкидлашича, мазкур навлар нафақат юқори ҳосилдорлиги, балки тез ўзгариб бораётган иқлим шароитига мослашувчанлиги ва узоқ давом этадиган қурғоқчилик даврларига бардошлилиги билан ҳам алоҳида аҳамият касб этади. Ушбу хусусиятлари туфайли янги навлар фақат Ўзбекистон қишлоқ хўжалиги учун эмас, балки сув тақчиллиги ва иссиқлик муаммолари тобора кучайиб бораётган Марказий Осиёнинг бошқа мамлакатлари — Қозоғистон, Тожикистон, Туркманистон ва Қирғизистон учун ҳам катта истиқбол ва амалий қиймат касб этади.

Шу билан бирга, делегация институтнинг моддий-техник базаси билан ҳам яқиндан танишди. Хусусан, тажриба майдонларида олиб борилаётган дала синовлари, замонавий экинлар уруғчилиги тизими, юқори унумдорликка эга уруғларни тозалаш ва саралаш ускуналари ҳамда қишлоқ хўжалигининг илғор техникалари кузатилди ва баҳоланди. Делегация аъзолари, шунингдек, институтда жорий этилган тупроқни муҳофаза қилувчи ва ресурс тежовчи деҳқончилик усуллари — хусусан, тупроққа ишлов бермасдан экин экиш усуллари, алмашлаб экиш тизимлари ва суғоришни оптималлаштириш бўйича илмий-амалий ёндашувлар — билан ҳам алоҳида қизиқиш билан танишди. Бу борада қўлга киритилган натижалар минтақада барқарор озиқ-овқат хавфсизлигини таъминлаш йўлида муҳим қадам сифатида баҳоланди.

Тақдим этилган маълумотлар делегация аъзоларида катта қизиқиш уйғотиб, институт фаолиятига юқори баҳо берилди. Учрашув давомида томонлар лалми шароитда тупроқни ҳимоя қилувчи ва ресурс тежовчи қишлоқ хўжалиги амалиётларини синовдан ўтказиш, ёмғир сувларини йиғиш технологияларини намойиш қилиш ҳамда биопестицидлар бўйича тадқиқотларни ривожлантириш истиқболларини муҳокама қилдилар. Мазкур ташриф илм-фан, инновация ва халқаро ҳамкорликни уйғунлаштирган ҳолда, иқлимга чидамли қишлоқ хўжалигини ривожлантириш учун муҳим асос яратди.

Томонлар илмий ишланмалар ва иқлимга ўзгаришига мос ечимларни амалиётга жорий этишда хотин-қизлар ҳамда ёшларнинг эҳтиёжларини инобатга олувчи ёндашувлар муҳим эканини ҳам таъкидладилар. Бу, айниқса, лалми ҳудудларда билим ва инновациялардан фойдаланиш имкониятларини янада кенгайтириш нуқтаи назаридан долзарбдир.