Самарқандда вилояти Пахтачи туманида 4 киши «Нарпай» каналида чўкиб, ҳалок бўлди. Бу ҳақда Фавқулодда вазиятлар вазирлиги хабар берди.

Маълум қилинишича, жорий йилнинг 31 май куни соат 20:25 да Самарқанд вилояти ФВБга «112» тизими орқали юк ташиш учун мўлжалланган электромопед ҳайдовчиси бошқарувни йўқотиб, унда бўлган 8 нафар фуқаро Пахтачи тумани «Украч» МФЙ ҳудудидан оқиб ўтувчи «Нарпай» каналига тушиб кетгани ҳақида хабар келиб тушган.

ФВВ қутқарувчилари хабарга асосан воқеа жойига етиб борганида, каналга тушиб кетган 8 нафар фуқародан 4 нафари аҳоли томонидан қутқариб қолингани маълум бўлган. Шундан сўнг зудлик билан сувда кенг кўламли қидирув-қутқарув ишларига киришилган.

Қутқарувчилар ва аҳоли ёрдамида олиб борилган сувда қидирув ишлари давомида қолган 4 нафар фуқаро ҳалок бўлгани аниқланиб, каналдан олиб чиқилган.

Олиб борилган суриштирув ишлари давомида аниқланишича, Пахтачи тумани «Украч» МФЙда яшовчи, 1984 йилда туғилган фуқаро ўз бошқарувидаги электромопедга жами 8 нафар шахсни – турмуш ўртоғи ҳамда ўзи ва қўшни хонадондан 6 нафар вояга етмаган болаларни миндириб, сайр қилаётган бўлган.

Ҳозирда воқеа жойида Пахтачи тумани прокуратураси, ИИБ, ФВБ томонидан ҳодисанинг келиб чиқиш сабабларини ўрганиш ишлари олиб борилмоқда.