Кеча, 3 июнь куни футбол бўйича Ўзбекистон аёллар миллий терма жамоаси «Aya Tri миллий кубоги — 2026» турниридаги дастлабки ўйинини ўтказди. Унда терма жамоамизга мусобақа мезбони Мьянма терма жамоаси рақиблик қилди.

Таъкидлаш керакки, ўйин олдидан Мьянмада об-ҳаво кескин ўзгарди ва учрашув бошланишига бир неча соат қолганда кучли ёмғир ёғди. Шунга қарамай, баҳс белгиланган вақтда бошланди.

Ўзбекистон миллий терма жамоаси баҳсни қуйидаги таркиб билан бошлади:

Дарвозабон:

Мафтуна Жонимқулова

Ҳимоячилар:

Мафтуна Шойимова

Дилрабо Асадова

Севинч Қўчқорова

Солиҳа Ҳусниддинова

Ярим ҳимоячилар:

Илвина Аблякимова

Людмила Карачик

Зарина Маматкаримова

Ҳужумчилар:

Нилуфар Қудратова

Меҳрибон Эгамбердиева

Диёра Ҳабибуллаева

Учрашув тенг курашлар остида бошланди. Ўзбекистон миллий терма жамоаси ўйиннинг дастлабки дақиқалариданоқ ташаббусни ўз қўлига олишга интилди. Натижада 22-дақиқада Нилуфар Қудратова ҳисобни очди. Биринчи бўлим шу ҳисобда якунланди.

Иккинчи бўлимда Мьянма терма жамоаси ташаббусни ўз қўлига олишга мажбур бўлди. Жамоа бутун бўлим давомида Мафтуна Жонимқулова қўриқлаётган дарвоза томон 9 та зарба йўллади. Аммо уларнинг ҳеч бири гол билан якунланмади.

Шу тариқа, Ўзбекистон аёллар миллий терма жамоаси халқаро мусобақадаги иштирокини ғалаба билан бошлади.

Ўйиндан сўнг Ўзбекистон аёллар миллий терма жамоаси бош мураббийи Котрина Кулбите «Халқ сўзи» нашрига махсус интервью берди.

«Ғалаба қозонганимиздан хурсандман. Ушбу турнир ноябрь ойида бўлиб ўтадиган йирик мусобақалар — Осиё ўйинлари ва қитъалараро Жаҳон чемпионати плей-офф босқичига тайёргарлигимизнинг муҳим қисми ҳисобланади.
Таркибга U20 миллий терма жамоасининг бир нечта футболчиларини жалб қилдик. Бу уларга катталар терма жамоаси сафида халқаро тажриба тўплаш ва ўз салоҳиятини намоён этиш имконини беради. Шунингдек, ушбу турнир айрим футболчилар учун миллий терма жамоа сафидаги илк учрашувларини ўтказиш имкониятини яратмоқда.
Мьянма кучли рақиб бўлиб, FIFA рейтингида биздан бир поғона юқорида эди. Шундай жамоага қарши ўйин имкониятларимизни синовдан ўтказиш, кучли ва заиф томонларимизни аниқлаш ҳамда олдинда турган муҳим баҳсларга қай даражада тайёр эканимизни баҳолаш учун яхши мезон бўлди», — деди терма жамоамиз устози.

Маълумот учун, Ўзбекистон миллий терма жамоаси «Aya Tri миллий кубоги — 2026» турниридаги кейинги ўйинини Таиланд терма жамоасига қарши ўтказади. Ушбу баҳс 6 июнь куни бўлиб ўтади.

Мезбон Мьянма терма жамоаси ҳам кейинги ўйинида Таиланд билан куч синашади. Ушбу учрашув 9 июнь куни ташкил этилади.