Қишлоқ ва маҳаллалар инфратузилмасини яхшилаш, аҳолига янада қулай шароитлар яратиш мақсадида Андижон вилояти Асака туманидаги Обод маҳалласида кенг кўламли бунёдкорлик ишлари амалга оширилмоқда. «Янги Ўзбекистон қиёфасидаги маҳалла» мезони асосида дастурга киритилган ҳудудда ички йўлларни таъмирлашга алоҳида эътибор қаратилган бўлиб, режадаги 12 километр йўлнинг 7 километрига асфальт қопламаси ётқизилди.

— Илгари кўчаларимизда юриш анча қийин эди, — дейди шу маҳаллада яшовчи Нурилло Райимжонов. — Бугун эса маҳалламиз кун сайин ўзгариб, обод қиёфа касб этмоқда. Йўллар таъмирланаётгани, атроф муҳит тартибга келтирилаётгани аҳолига катта қулайлик яратмоқда. Бу ишлар учун давлатимиз раҳбарига ва меҳнат қилаётган қурувчиларга маҳалламиз аҳолиси номидан миннатдорлик билдирамиз.

Айни пайтда ҳудудда аҳоли турмуш даражасини янада яхшилашга қаратилган қурилиш ва ободонлаштириш ишлари жадал суръатларда давом эттирилмоқда. Ушбу бунёдкорлик ишлари яқин келажакда «Обод» маҳалласининг замонавий ва кўркам масканга айланишига хизмат қилади.

Саминжон ҲУСАНОВ, «Халқ сўзи».