Сенатнинг Аграр, сув хўжалиги масалалари ва экология қўмитаси раиси ўринбосари Сайёра Абдикаримова Тошкент тўқимачилик ва енгил саноат институтида ташкил этилган «Яшил мода – келажак нафаси» мавзусидаги кўргазмада иштирок этди.

Тадбирнинг асосий мақсади экологик барқарорликни таъминлаш, мода саноатида атроф муҳитга зарар етказмайдиган инновацион ёндашувларни кенг тарғиб қилиш ҳамда ёш дизайнерларнинг ижодий ишланмаларини қўллаб-қувватлашдан иборат.

Кўргазмада талабалар ва ёш дизайнерлар томонидан яратилган экологик тоза материаллардан тайёрланган кийим-кечак коллекциялари намойиш этилди. Хусусан, қайта ишланган матолар, табиий толалар ва чиқиндисиз ишлаб чиқариш технологияларига асосланган дизайнлар меҳмонларда катта қизиқиш уйғотди.

Тадбирнинг расмий очилиш маросимида сенатор сўзга чиқиб, бугунги кунда таълим муассасаларида экологик маданиятни шакллантириш ҳамда талабаларни барқарор ривожланиш тамойиллари асосида тарбиялаш муҳим аҳамият касб этаётганини алоҳида таъкидлади.

Тадбир доирасида мутахассислар иштирокида давра суҳбатлари, маҳорат дарслари ва тақдимотлар ўтказилиб, уларда «яшил мода» концепциясининг аҳамияти, глобал мода саноатидаги экологик муаммолар ҳамда уларнинг ечимлари муҳокама қилинди.

Мазкур кўргазма нафақат ижодий платформа, балки ёшлар онгида экологик маданиятни шакллантиришга, табиатга масъулиятли муносабатни тарғиб қилишга хизмат қилувчи муҳим ташаббус сифатида эътироф этилди.

Тадбир якунида энг яхши дизайн ишлари ва инновацион лойиҳалар муаллифлари махсус номинациялар бўйича тақдирланди.