Соғлиқни сақлаш вазирлиги давлат маблағлари ҳисобидан даволаниш йўлланмаси қандай расмийлаштирилиши тўғрисида маълумот берди,

Билдирилишича, бу борадаги қоида ва талаблар «Давлат ва нодавлат тиббиёт ташкилотларида Ўзбекистон Республикаси Давлат бюджети маблағлари ҳисобидан тиббий ёрдам кўрсатиш тартиби тўғрисида»ги низомда ўз ифодасини топган.

Унга кўра, бемор имтиёзли йўлланма асосида тиббий ёрдам олиш учун ўзи бириктирилган бирламчи тиббий-санитария ёрдами муассасасига мурожаат қилади ва бириктирилган оилавий шифокор томонидан тиббий кўрикдан ўтказилади.

Шундан сўнг у бир иш кунида туман (шаҳар) даражасидаги тиббиёт муассасасининг ёки идоравий тиббиёт муассасасининг тор соҳа мутахассиси кўригига йўналтирилади. Тор соҳа мутахассиси томонидан бемор бир иш кунида амалдаги клиник протоколлар ҳамда ташхислаш ва даволаш стандартларига мувофиқ текширувдан ўтказилади.

Агар стационар шароитда тиббий ёрдам олишга кўрсатма бўлса, беморга тор соҳа мутахассиси ёки оилавий шифокор томонидан туман (шаҳар) даражасидаги тиббиёт муассасасида режали стационар тиббий ёрдам олиш учун электрон ахборот тизими орқали йўлланма берилади.

Тиббий ёрдам ҳудуд ёки республика даражасидаги тиббиёт ташкилотларида кўрсатилиши лозим деб топилса, тор соҳа мутахассиси бир иш кунида электрон тизим орқали ҳудудий даражада йўналиш бўйича ташкил қилинган тиббий-танлов комиссиясига йўлланмани тасдиқлаш учун сўровнома юборади.

Беморнинг маълумотлари бир иш кунида ҳудудий даражада йўналиш бўйича тиббий-танлов комиссиялари томонидан ўрганилади, текширув ва кўрик натижалари таҳлил қилинади. Тасдиқланган касалликлар рўйхатига мувофиқ у ҳудудий даражадаги тиббиёт ташкилотида стационар даволаниши белгиланса, йўлланма тасдиқланади.

Бемор республика даражасидаги тиббиёт ташкилотида стационар даволаниши зарур, деб топилса, унинг маълумотлари бир иш кунида йўналишлар бўйича республика даражасидаги тиббий-танлов комиссиясига йўналтирилади. Бунда ҳудудий даражадаги тиббий-танлов комиссияси томонидан заруратга кўра бир иш кунида беморга қўшимча текширув ва (ёки) тор соҳа мутахассиси кўриги белгиланиши мумкин.

Юборилган маълумотлар республика даражасидаги йўналиш бўйича тиббий-танлов комиссиялари томонидан ўрганилади ва натижаси бўйича икки иш кунида электрон ахборот тизими орқали хулоса берилади.

Беморга давлат маблағлари ҳисобидан режали стационар тиббий хизмат кўрсатиш лозим бўлган тиббиёт ташкилоти даражаси тасдиқланади ҳамда маълумот электрон ахборот тизими орқали фуқаронинг Ягона интерактив давлат хизматлари порталидаги шахсий кабинетига, шунингдек, у бириктирилган бирламчи тиббий-санитария муассасаси ёки идоравий тиббиёт муассасасига юборилади.