Ўзбекистон миллий терма жамоасининг 2026 йилги Жаҳон чемпионати ўйинларини жамоавий томоша қилиш учун республика бўйлаб танлаб олинган умумтаълим мактаблари рўйхати эълон қилинди.

Билдирилишича, жорий йилнинг июнь июль ойларида ўтказиладиган футбол бўйича Жаҳон чемпионатида юртимиз шарафини ҳимоя қиладиган футболчиларни қўллаб-қувватлаш мақсадида ҳудудлардаги умумтаълим мактабларида «Мухлислар майдони» лойиҳаси ташкил этилган.

Лойиҳа доирасида мамлакатнинг 208 та туман (шаҳар)ида танлаб олинган мактабларда катта экранлар ўрнатилиб, ўқувчилар, ота-оналар ва маҳалла аҳолиси Ўзбекистон миллий терма жамоасининг ўйинларини жонли эфирда томоша қилиши мумкин бўлади.

Маълумот учун, Ўзбекистон терма жамоаси гуруҳ босқичида қуйидаги учрашувларда майдонга тушади:

Ўзбекистон — Колумбия (18 июнь, соат 07:00);
Ўзбекистон — Португалия (23 июнь, соат 22:00);
Ўзбекистон — Конго (28 июнь, соат 04:30).