“Халқ сўзи” нашрида “Мундиал сари” рукни давом этади. Бугунги сонимизда “B” гуруҳи вакили Швейцария терма жамоаси ҳақидаги маълумотлар билан танишамиз.

Умумий маълумотлар

Швейцария футбол ассоциацияси 1895 йилда ташкил этилган. Ушбу мамлакат 1904 йилдан бери ФИФАнинг аъзоси ҳисобланади. Шунингдек, мамлакат 1954 йилда Европа футбол ассоциацияси, яъни УЕФАнинг расмий аъзосига айланган.

Швейцария миллий терма жамоаси тарихдаги дастлабки ўйинини 1905 йилнинг 12 февраль санасида Франция терма жамоасига қарши ўтказган ва мазкур баҳсда 1:0 ҳисобида мағлубиятга учраган. Швейцария термаси тарихдаги энг йирик ғалабасини Литва термаси устидан қўлга киритган. 1924 йил Париж шаҳрида бўлиб ўтган мазкур баҳсда жамоа 9:0 ҳисобида ғалаба қозонган.

Швейцария миллий терма жамоаси футбол бўйича Жаҳон чемпионатларида жами 12 марта иштирок этган. Жамоанинг мундиалдаги дастлабки иштироки 1934 йилда кузатилган бўлиб, ўшанда жамоа мусобақанинг чорак финалига қадар етиб борган. Шунингдек, жамоа 1938 йилги ҳамда 1954 йилги мусобақаларда ҳам чорак финалгача етиб боришни уддалаган. Бу мамлакатнинг Жаҳон чемпионатларидаги энг яхши натижаси ҳисобланади.

Швейцария миллий терма жамоаси Европа чемпионатида 6 марта иштирок этган ва энг яхши натижаси чорак финал ҳисобланади. Жамоа 2 марта Европа чемпионати чорак финалида ўйнаган.

Шунингдек, Швейцария терма жамоаси Европа Миллатлар лигасида ҳам 2019 йил кучли тўртликка киришни уддалаган.

Жаҳон чемпионати сари босиб ўтган йўли

Европада Жаҳон чемпионати саралаши 2 та асосий босқичдан иборат бўлди. Швейцария терма жамоаси саралашдаги иштирокини “B” гуруҳида бошлади. Гуруҳда Швейцариядан ташқари Швеция, Косово ва Словения терма жамоалари бор эди.

“B” гуруҳида саралаш 2025 йил сентябрь ойида старт олди. Швейцария ушбу ойнинг ўзидаёқ гуруҳда яққол фаворит эканини кўрсата олди.

Жамоа дастлабки турда ўз майдонида Косово термасини 4:0 ҳисобида мағлубиятга учратган бўлса, иккинчи турда Словения устидан 3:0 ҳисобида ғалаба қозонди.

Октябрь ойида эса жамоа 2 та қийин ўйин ўтказди. Дастлаб Стокгольмда асосий рақиби Швецияни 2:0 ҳисобида мағлуб этди. Тўртинчи турда эса Словенияга қарши ўйинда дуранг натижа қайд этилди.

Саралашнинг сўнгги ойи олдидан Швейцарияда тўғридан-тўғри йўлланмани қўлга киритиш учун ажойиб имконият бор эди ва амалда ҳам шундай бўлди.

Дастлаб ўз майдонида Швецияни 4:1 ҳисобида мағлуб этган жамоа, сўнгги турда Косово билан 1:1 ҳисобида дуранг ўйнади.

Шу тариқа жамоа саралаш босқичини 14 очко билан якунлаб, гуруҳ етакчиси сифатида мундиал йўлланмасини қўлга киритди.

Сўнгги ўйинлар

Швейцария терма жамоаси сўнгги 12 ой ичида жами 10 та ўйин ўтказди. Ушбу ўйинлардан 6 таси ғалаба, 3 таси дуранг ва 1 таси мағлубият билан якунланган.

Жамоа охирги ўйинларида Германияга мағлуб бўлиш билан бир қаторда Швеция, Косово, Мексика ва АҚШ термаларини мағлуб этишни ҳам уддалади.

Бош мураббий

Айни вақтда Швейцария терма жамоасини турк келиб чиқишига эга мутахассис Мурат Якин бошқармоқда. 51 ёшли мутахассис жамоани 2021 йил август ойидан бери бошқариб келмоқда.

Якин бунга қадар бош мураббий сифатида Швейцариянинг турли ёшдаги терма жамоаларида, шунингдек, “Спартак Москва”, “Люцерн”, “Сьон”, “Грассхопперс”, “Тун”, “Базель” каби клубларда фаолият олиб борган.

У мураббий сифатида 2 марта Швейцария Суперлигасида ғолиб бўлган. Шунингдек, 1 марта Швейцария Челленж лига мусобақасида ўз жамоаси билан тенгсиз бўлган. 2 марта Швейцарияда лиганинг энг яхши мураббийи деб тан олинган.

Футболчилар

Айни вақтда швейцариялик энг машҳур футболчилар ҳақида гап борса, қуйидаги футболчиларни эслаб ўтиш мумкин:

Грегор Кобель — (“Боруссия Дортмунд”, Германия);

Дан Ндойе — (“Ноттингем Форест”, Англия);

Ардон Жашари — (“Милан”, Италия);

Мануэль Аканжи — (“Интер”, Италия);

Денис Закария — (“Монако”, Франция);

Закари Атекaме — (“Милан”, Италия);

Фабиан Шер — (“Ньюкасл”, Англия);

Лука Жакез — (“Штутгарт”, Германия).

Жаҳон чемпионатидаги ўйинлари ва саналар

Швейцария миллий терма жамоаси Жаҳон чемпионатида “B” гуруҳидан ўрин олди. Гуруҳда Швейцариядан ташқари Канада, Қатар ва Босния ва Герцеговина терма жамоалари ҳам мавжуд.

Ушбу терма жамоаларга қарши баҳслар қуйидаги саналарда бўлиб ўтади:

Қатар — Швейцария (14 июнь);

Швейцария — Босния ва Герцеговина (19 июнь);

Швейцария — Канада (25 июнь).

Жамоанинг мундиалдаги имкониятлари

Швейцария терма жамоаси кўпчилик мутахассислар томонидан “B” гуруҳининг етакчиси бўлиши таъкидланмоқда. Жамоанинг Босния ва Герцеговина, шунингдек Қатардан кучлироқ эканлиги кўп жиҳатдан аниқ. Аммо, гуруҳда мезбон Канада термасининг борлиги вазиятни бироз чигаллаштиради.

Шундай бўлса-да, кўпчилик мутахассислар Швейцария терма жамоасини мусобақанинг нимчорак финал босқичигача етиб боришини тахмин қилмоқда.