Айни пайтда Андижон вилояти делегацияси Хитой давлатида бўлиб турибди. Ташриф доирасида Ўзбекистон ва Хитой тадбиркорлари ҳамда йирик компаниялар вакиллари иштирокида юқори даражадаги бизнес-форум ташкил этилди. Форум доирасида учрашувлар ўтказилиб, умумий қиймати 1 миллиард АҚШ долларига тенг бўлган 18 та муҳим келишув имзоланди. Бу келишувлар саноат, қишлоқ хўжалиги, қайта ишлаш ва экспорт йўналишларида янги инвестиция лойиҳаларини амалга оширишга хизмат қилиши кутилмоқда.

— Улуғнор тумани бўйича эришилган келишувлар алоҳида аҳамиятга эга, — дейди вилоят ҳокимлиги масъул ходими Рустамжон Эшонов. — Xinjiang Huize Food Group Co., Ltd. компанияси билан ҳамкорликда тумандаги 3000 гектар фойдаланилмаётган ер майдонларида интенсив усулда помидор етиштириш режалаштирилмоқда. Ҳар гектардан 150 тоннагача ҳосил олиш кўзда тутилган. Шунингдек, тумандаги «Асака пахта тозалаш» АЖга қарашли мулкий мажмуа негизида 100 миллион долларлик замонавий помидорни қайта ишлаш корхонаси ташкил этилади. Унда кетчуп, помидор кукуни ва шарбат ишлаб чиқарилиб, маҳсулотлар экспортга йўналтирилади.

Мутахассисларнинг фикрича, вилоят делегациясининг бу галги ташрифи Андижон иқтисодий-ижтимоий ҳаётида муҳим ўрин тутади. Чунки эришилган келишувлар орқали янги иш ўринлари яратиш, экспорт ҳажмини ошириш, инновацион технологияларни жалб этиш ва қишлоқ хўжалигида юқори самарадорликка эришиш имконияти кенгаяди. Айниқса, Хитой, Европа ва АҚШдан профессор-олимлар жалб қилиниши, дуал таълим тизимини жорий этиш ҳамда янги навлар устида илмий ишларни ташкил этиш вилоятда аграр соҳанинг мутлақо янги босқичга чиқишига замин яратади.

Делегация томонидан, шунингдек, Андижон вилоятининг саноат, қишлоқ хўжалиги, тўқимачилик, мини ГЭСлар, мебелсозлик ва логистика соҳаларидаги инвестициявий имкониятлари тақдим этилмоқда.

Саминжон ҲУСАНОВ, «Халқ сўзи».