Маълумки, 2026-2027 ўқув йили учун иккинчи мутахассисликка қабул шу йилнинг 10 июль кунидан бошланиб, 10 августгача давом этади. Талабгорлар «my.edu.uz» орқали онлайн рўйхатдан ўтишлари мумкин.

Таълим хабарлари Telegram-каналининг маълумот беришича, иккинчи олий таълим олишда биринчи диплом йўналиши аҳамиятга эга эмас ва исталган бошқа мутахассисликни танлаш имконияти мавжуд.

«Соддароқ айтганда, сиз биринчи дипломингиз бўйича математика йўналишини тамомлаган бўлсангиз ҳам, иккинчи мутахассислик учун биология, иқтисод ёки филология каби мутахассисликларга бемалол топшира оласиз», — дейилади хабарда.

Иккинчи ва ундан кейинги олий таълимга қабул қилиш тартиби олий таълим муассасасининг хусусиятидан келиб чиқиб, олий таълим муассасаси кенгаши томонидан белгиланади ва ҳар йили 1 июлга қадар олий таълим муассасасининг расмий веб-сайтида эълон қилинади.

Олий таълимга қабул қилиш натижалари эса ҳар йили 30 августга қадар олий таълим муассасалари томонидан эълон қилиниши белгиланган.