Наманган ва Жиззах вилоятларида тамаки маҳсулотларининг ноқонуний савдоси билан шуғулланиб келган шахс ушланди. Бу ҳақида Иқтисодий жиноятларга қарши курашиш департаменти хабар берди.

Маълум қилинишича, Бош прокуратура ҳузуридаги Департаментнинг Наманган вилояти бошқармаси ва бошқа ҳуқуқни муҳофаза қилувчи орган ходимлари ҳамкорлигида тезкор тадбир ўтказилган.

Унда тамаки маҳсулотларининг ноқонуний савдоси билан шуғулланиб келган фуқаро М.С.нинг бошқарувидаги «Cobalt» русумли автотранспорт воситаси тўхтатилиб кўздан кечирилганда, автотранспорт воситаси салони ва юкхонасида чет элда ишлаб чиқарилган «Милано» номли 5 000 қути акциз маркасиз тамаки маҳсулотларини сотиш мақсадида Фарғона вилоятига олиб кетаётганлиги аниқланиб, ушбу тамаки маҳсулотлари ашёвий далил сифатида расмийлаштириб олинган.

Шу каби яна бир ҳолат, Департаментнинг Жиззах вилояти бошқармаси ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда ҳам фош қилинган.

Хусусан, тамаки маҳсулотларининг ноқонуний савдоси билан шуғулланиб келган муқаддам судланган фуқаро М.А.нинг бошқарувидаги «Damas» русумли автотранспорт воситаси кўздан кечирилганда автотранспорт воситаси салонида 17 турдаги 2 041 қути акциз маркасиз тамаки маҳсулотларини сотиш мақсадида Жиззах шаҳрига олиб келганлиги маълум бўлган.

Ҳозирда мазкур ҳолатлар юзасидан Жиноят кодексининг 25, 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш) билан жиноят ишлари қўзғатилиб, тергов ҳаракатлари ўтказилмоқда.