АҚШ президенти маъмурияти Эронга музокаралар столига қайтиши учун бир неча кун вақт беради. Акс ҳолда ҳарбий ҳаракатлар қайта бошланиши мумкин, деб хабар бермоқда Axios.

Портал суҳбатдошларидан бирининг таъкидлашича, Америка етакчиси Дональд Трамп эронликлар «ўз ишларини тартибга солиб олишлари» учун сулҳни яна 3–5 кунга узайтиришга тайёр. У ўт очишни тўхтатиш тартиби муддатсиз бўлмаслигини қўшимча қилган.

Америкалик мулозимнинг қайд этишича, дипломатик ҳаракатлар учун бироз кўпроқ вақт беришга қарор қилинган.

Аввалроқ Трамп Эрон билан 21 апрель куни муддати тугайдиган ўт очишни тўхтатиш тартибини узайтиришини эълон қилган эди.

Эрон парламенти спикерининг маслаҳатчиси Маҳди Муҳаммадий Вашингтон томонидан эълон қилинган сулҳнинг узайтирилиши бир найранг эканини ва бу унга Ислом Республикасига қарши янги кутилмаган зарба тайёрлаш имконини беришини маълум қилди.