Айни кунларда Фарғона боғларида етиштирилган гилос, ўрик, шафтоли каби ширин-шакар мевалар дунёнинг 50 дан ортиқ давлатларига экспорт қилиняпти. Эътиборлиси, жорий йилдан мевалар экспорти географияси кенгайиб, Осиё ва Европа қитъаси, Лотин Америкаси ва араб мамлакатлари бозорлари янгитдан кашф этилди.

Шу йилнинг март ойида Малайзияда Фарғона савдо уйи ташкил этилиб, қулай ҳудудда жойлашган ушбу мамлакат орқали Осиё қитъаси бозорларига маҳсулот экспортини кўпайтириш режалаштирилган эди. Куни кеча Фарғона вилоятида етиштирилган ўрик ва шафтоли биринчи марта ҳаво транспорти орқали мамлакат пойтахти Куала-Лумпур шаҳрига етказиб берилди.

Таъкидлаш ўринлики, бунга қадар мазкур давлатга Фарғонадан гилос экспорти яхши йўлга қўйилган бўлиб, эндиликда гилос етказиб бериш салмоғини янада ошириш мақсад қилинган.

— Ўрик ва гилосни қабул қилиб олиш жараёнида Фарғона савдо уйи ҳам тантанали равишда ўз иш фаолиятини бошлади, — дейди Ўзбекистон савдо-саноат палатаси Фарғона вилояти ҳудудий бошқармаси бошлиғи Шерзод Юлдашев. — Жаҳон бозорида харидоргир меваларимиз экспорти «Quva Agrostar» ҳамда «КК24» корхоналари ҳамкорлигида амалга оширилди. Маҳсулотлар Малайзия бозорининг талаблари ва сифат стандартларига мувофиқ ҳолда тайёрланиб, халқаро логистика тизими орқали етказилди.

Икки юрт вакиллари иштирокида бўлиб ўтган тадбирда айни жараёнда йўлга қўйилган изчил саъй-ҳаракатлар ўзаро манфаатли ҳамкорликни янги босқичга олиб чиқишга хизмат қилиши таъкидланди. Яқин истиқболда экспорт ҳажмини янада ошириш, маҳсулот турларини кенгайтириш ҳамда Малайзия бозорига барқарор равишда етказиб бериш тизимини шакллантириш зарурлиги қайд этилди.

Ўз навбатида сархил мевалар, қуритилган ва қадоқланган ҳолда жўнатилган маҳсулотларимиз тақдимоти ўтказилди. Ўзбекона удумга кўра, тадбир қатнашчиларига табиий дармондориларга бой ва экологик тоза маҳсулотларимиздан баҳраманд бўлиш имконияти яратилди. Мезбонлар меваларимизнинг бетакрор ва ширин таъмига юксак баҳо бердилар.

Ботир МАДИЁРОВ, «Халқ сўзи».