Сўнгги йилларда Ўзбекистон ва Грузия ўртасидаги ҳамкорлик барча соҳаларда, жумладан маданият ва санъат йўналишида ҳам изчил ривожланиб бормоқда. Грузия Ўзбекистоннинг Кавказ минтақасидаги муҳим ва яқин ҳамкорларидан бири ҳисобланади.

Бугунги кунда Ўзбекистон ва Грузия ўртасидаги маданий ҳамкорлик тобора кенгайиб бораётганини икки давлатда ташкил этилаётган халқаро тадбирларда санъаткорларимизнинг фаол иштирокида ҳам яққол кўриш мумкин.

Хусусан, Ўзбекистонда ўтказиб келинаётган «Лазги» халқаро рақс фестивали, Бахшичилик санъати халқаро фестивали каби йирик халқаро маданий тадбирларда Грузия санъаткорлари мунтазам иштирок этиб келмоқда. Шунингдек, театрлар ўртасидаги ҳамкорлик ҳам ривожланиб бормоқда. Ушбу ҳамкорликни янада ривожлантириш мақсадида, Ўзбекистонда 9-11 март кунлари «Грузия маданияти кунлари» тадбирлари бўлиб ўтмоқда.

Маданият кунлари доирасида бугун, 9 март куни Маданият вазирлигида Ўзбекистон маданият вазири Озодбек Назарбеков ҳамда Грузия маданият вазири Тинатин Рукҳадзе хоним ўртасида ҳамкорлик учрашуви бўлиб ўтди. Учрашув давомида бир қатор ҳамкорлик масалалари муҳокама этилди.

Учрашув давомида иккитомонлама маданий ҳамкорликни янада ривожлантириш мақсадида, қуйидаги бир қатор масалалар муҳокама этилди:

— Маданият ва санъат фестивалларида мунтазам иштирок этиш амалиётини давом эттириш. Хусусан, жорий йил апрель ойида Хива шаҳрида бўлиб ўтадиган «Лазги» халқаро рақс фестивалида иштирок этиш;

— Кино соҳасида ҳамкорликни ривожлантириш, хусусан, Грузия Миллий фильм маркази ҳамда Ўзбекистон Кинематография агентлиги ўртасида ҳамкорлик Битимини имзолаш;

— Руставели номидаги Грузия Миллий академик театри ҳамда Алишер Навоий номидаги Ўзбекистон давлат катта театри ўртасида ҳамкорликни йўлга қўйиш ва дастурни имзолаш;

— Икки давлатнинг миллий рақс санъатини ривожлантириш ва кенг тарғиб қилиш мақсадида, Тбилиси Хореография мактаби ҳамда Тошкент давлат хореография академияси ўртасида ҳамкорликни йўлга қўйиш каби таклифлар кўриб чиқилди.

Учрашув якунида, Ўзбекистон маданият вазири Озодбек Назарбеков Грузия маданият вазири Тинатин Рукҳадзе хонимни «Лазги» халқаро рақс фестивалига шахсан иштирок этишини таклиф этди.

Маълумот ўрнида, икки давлат маданият вазирлари бугун пойтахтдаги Алишер Навоий номидаги Ўзбекистон давлат академик катта театрида бўлиб ўтадиган Ўзбекистонда «Грузия маданияти кунлари»нинг очилиш маросимида иштирок этади.