Россия расмийлари мамлакатга кириб келаётган чет эл фуқароларидан биометрик маълумотларни йиғиш бўйича эксперимент муддатини узайтирди. Бу ҳақда ТАСС хабар бермоқда.

Қайд этилишича, эксперимент 2026 йилнинг 30 июнига қадар ўтказилиши режалаштирилган эди.

«Эндиликда у 2027 йилнинг 31 декабригача узайтирилди», — дейилади хабарда.

Босқичларнинг узайтирилиши тўпланган ижобий тажрибани ҳисобга олган ҳолда, шунингдек, чегара орқали ўтиш пунктларини изчил модернизация қилиш ва биометрик идентификация дастурий таъминотини такомиллаштириш зарурати билан изоҳланмоқда.

Экспериментнинг биринчи босқичи 2024 йил декабрь ойида бошланган эди. Москва ва Москва вилоятидаги халқаро аэропортлар, шунингдек, Оренбург вилоятидаги «Маштаково» автомобиль ўтказиш пункти орқали Россия Федерациясига кириб келаётган чет элликлар ўтиш пунктларида биометрик маълумотларини топшириши шарт.

Мигрантларнинг кириши бўйича экспериментнинг янги босқичи эса 2025 йил 30 июндан бошланган бўлиб, унда мамлакатга келиш мақсадлари ҳақида олдиндан хабар бериш ва биометрия топшириш мажбурияти кўзда тутилган.